Nahigugma sa anak sa ungo

MOTUO KA’G DILI (Matag Domingo)

Panadtaran, San Fernando, Cebu

Duol na si Otik sa balay nila ni Catalina. Guwapa kini siya ug daghan ang nangulitawo niini. Ning gabhiona karon ingon nabatyagan ni Otik nga lahi karon sa miaging gabii. Mora’g duna nay nabati si Otik nga tingog sa wakwak nga mura’g naa lang sa may tumoy sa lubi.

Ang tingog sa wakwak nagkakusog ug ingon sa gibati og kahadlok si Otik apan giisog niya ang iyang kaugalingon kay dili na siya mobalik. Ang iyang tumong karon mao man ang pagpamisita kang Catalina. Sayo pa man unta karong gabii, pasado pa gani alas siyete unya nagsibaw na ang tingog sa wakwak.

Sa iyang paminaw ni Otik mura’g duha ka tingog sa wakwak nga nagtubagtubag. Giibot ni Otik ang iyang punyal ug unya nangadye. Duna siya’y nakat-onan gamay sa orasyon nga panguntra sa ungo nga gipasag-ulo kaniya sa iyang lolo Dadoy nga usa ka albularyo. Tuod, sa iyang pagyawyaw ingon sa mihunong ang wakwak ug maoy mipuli ang tingog sa gangis ug mangloy.

“Dunay wakwak, Talina, sa akong pagpaingon dinhi,” ni Otik pa ngadto sa babaye nga iyang gimahal.

Kapin na sa lima ka bulan ang ilang relasyon ni Catalina. Dunay tabitabi nga iyang nadunggan sa kaliwat sa dalaga nga mga ungo kuno.

Pero, alang kang Otik bisa’g pinakamangtas pa si Catalina sa tibuok kalibotan dili gyud mahanaw ang iyang pagmahal niini. Si Catalina ang binuhat alang kaniya. Si Catalina mao ang iyang unang gugma.

“Wakwak, Otik, hala, uy, giabat diay ka!!” Mura’g gibati’g kabalaka ang dalaga. “Unya, unsa man ila kang gibugno?”

“Wa-wa man, pero, sa akong paminaw duol na lang kaayo kini sila ug maabot na lang seguro ko’g kab-ot, ug kay ngitngit nangadye na lang ko,” kalma nga mipahayag si Otik.

Samtang nagsultihanay sila si Otik ug Catalina dihay mura’g mihugan-ob sa kusina, ug nahaugpot si Otik. “Uy, unsa ron, Talina?” ni Otik pa.

“Ha, kuan, sila tingali ron si Tatay ug Nanay. Nahiuli na tingali sila gikan sa isla. Ug duna sila’y gidalang kahoy,” pahiyom sa dalaga.

Taudtaod migawas gikan sa kusina ang tatay ug nanay ni Catalina nga sila si Tonang ug Merto. Kalkag kaayo ang ilang buhok ug mura’g hait kaayo’g tinan-awan ngadto sa ulitawo. Si Merto ang namulong, Ikaw, lalaki gusto namo nga dili ka na mobalik pa dinhi sa amo. Wa mi gusto nimo nga mahimong hinigugma ni Catalina. Duna na kami gitagana nga lalaki alang kang Catalina nga maoy iyang mamahimong bana ug kini mao si Rogario, ang anak nila ni Paeng ug Menciang.

“Tay, Nay, mahal nako si Otik ug wala koy gusto kang Rogario,” hinay’ng tubag ni Catalina.

“Noy Merto, Nang Tonang, bisa’g patyon ko ninyo karon dayon, dili mahitabo nga magpalayo ako ni Catalina kay mahal ko siya ug karon dayon anhi ko magpakamatay sa iyang atubangan...” Ug miibot si Otik sa iyang punyal.

Kalit lang nahimong laksot ang mga nawong nilang Tonang ug Merto ug gidasmagan si Otik, apan gisugat sila ni Catalina ug nagkalambura ang tulo ka mga mangtas, samtang si Otik ingon sa giugbok nga kandila nga naghinan-aw sa tulo ka mga mangtas nga ungo nga nagpakita sa ilang kabangis. (Katapusan)