Dali mahurot

Dear Tita Salie,

Maayong adlaw. Tagoa lang ko sa ngalan nga sweet 16, from the  province of Bohol, dili pa minyo apan dunay live-in partner ug may 1 ka buok anak.

Ang akong problema kabahin kini sa akong partner, Tita, nga hilabihan ka hingasaba ug yawyawan kaayo.

Wala koy trabaho, Tita, ug anaa lang ko sa balay ug ako ang nag-alaga sa among anak ug ang mga buluhaton sa panimalay ug ang akong partner maoy nangita og panginabuhian og kuwarta alang sa among mga gastohan.

Maglagot lang gyud ko niining akong partner kay permi lang ko niyang kasab-an bisan kun wala’y igong hinungdan. Mora ko og bata nga yanoyanohon lang niya og kasaba, Tita.

Ang kasagaran gyud namong awayan mao ang mahitungod sa kuwarta. Masuko man gud siya tungod kay ngano kuno nga dali kaayong mahurot ang kuwarta nga iyang ihatag kanako, nga unta wala man ko’y laing gipamalit gawas sa among pagkaon. Dili man lang gani ko moreklamo kaniya nga magsige siya og panugal tungod lagi kay siya man ang nangita og kuwarta.

Dili ko kasabot sa iyang batasan, Tita, ug kanunay gyud kong maglagot. Unsay angay nakong buhaton? Palihog pasabta ko. Thank you so much.

* * *

Maayong adlaw,

Ako usab ang mangumpra alang sa konsumo sa akong pamilya, busa, nakasabot ko sa imong gibati karon. Kay tinuod gyud kini nga matingala na lang ta kay gamay pa ang atong napalit apan nahurot na ang atong kuwarta. Daghan kanato ang moingon nga “mahal na gyud ang mga palitunon karon.” Apan kining maong panultihon dili nato mapamatud-an kun dili nato suwayan o buhaton nga kita gyud ang mangunay pagpamalit sa grocery o merkado.

Mao usab kini ang kasagaran tema sa mga magtiayon nga maglalis mahitungod sa ilang budget sa panimalay. Masuko ang bana ug magduda ang bana kun unsay gigastohan sa kuwarta kay nganong dali na kining mahurot samtang iyang gi-intrigo didto sa iyang asawa. Ingon sila niini tungod kay wala man nila makit-i ang kamatuoran, ang kamatuoran sa giingon nga mahal na ang palitunon.

Mas maayo seguro, kamong mga magtiayon nga mao kini ang kanunay lalisan, pagkuyog mong duha sa pagpangumpra. Kamong mga bana nga yawyawan kuyogi makausa ang inyong asawa aron inyong mahibaw-an nganong  dali mahurot ang inyong kuwarta.

Dad-a ang imong bana sa imong pag-grocery. Huwata nga wala siya’y trabaho aron  imong ipakita kaniya giunsa mo pag-budget ang inyong kuwarta. Aron ang iyang isugal-iya, na lang idugang alang sa imong budget.

-- Tita Salie