Bidlisiw sa Kabuntagon

Gula 2

Damgo g’yud ni Tessie nga makabangon pa siya gikan sa iyang pagkahisukamod mao nga gusto siya nga makaangkon og kaugalingong panimalay. Sayud siya nga kun moabut na ang higayon nga maisip na siya nga lawos nga pagkabuwak, wala na’y molingi pa kaniya.

Usa ka gabii nga mi-duty si Tessie sa gialagaran niya nga Wildflower Bar, gibisitahan siya ni Ely nga may kauban nga tulo ka laing lalaki. Gitibol nila ni Ely ug kaubanan si Tessie ug giorderan og ladies drink.

Nakabantay si Tessie nga ang kauban ni Ely nga nagpaila nga si Magno nagpunay og tutok kaniya. Gilainan kaayo si Tessie kay mora’g matunaw siya sa tinan-awan ni Magno. Diha g’yuy higayon nga nagkaabot ang masi’g nila ka tinan-an.

“Tess, mora’g nakabantay ko nga naibog nimo ning akong kauban da…Dili na lang ko modayon sa akong tinguha nimo kay ipalabi na lang nako sa akong amigo,” matud ni Ely nga nagngisi nga mitutok sa iyang higala.

“Unya, dili na diay ko nimo tabangan Ly nga maka-avail og relocation site?” ni Tessie pa nga ang tingog may dala nga kasagmuyo. “Tabangan gihapon uy, bisan kana si Magno makatabang nimo na kay amigo ‘sab na sila si atorni,” dali nga tubag ni Ely.

Mitindog si Ely sa tumong nga magkatupad sila si Tessie ug Magno. Gipatung-an si Tessie nila’ng Ely ug Magno. Taud-taud, misinyas si Ely sa laing dancer nga nagbarug sa daplin ug iyang gipalingkud tupad kaniya dapit sa wala.

Hanas na kaayo si Ely kun unsay buhaton ngadto sa mga babaye kun mosulod siya’g bar. Giagbayan dayon niya ug taud-taud nakahawok dayon sa dancer ang dukirok sa tsiks. Nasiplatan ni Magno nga gipakita ni Ely ang dancer sa iyang pitaka nga daghan og kwarta.

“Abtika ning imong kauban uy, mao pa gani’g pagkaila niya sa akong kaubang dancer giayo na man ug lambuyog,” giingnan ni Tessie si Magno. Igo lang mipahiyom og nakapanglingo-lingo si Magno.

Pormal si Magno kay gani igo lang niya nga gigunitan ug gipislit-pislit ang tuo nga palad ni Tessie. Ang tinuod, gusto unta niya nga sundon ang gihimo ni Ely sa iyang kapartner apan maikog siya ni Tessie.

Apan kalit lang misiga ang mga mata ni Magno sa iyang nakita dihang miduko siya. Ang tuo nga kamot ni Ely didto magsigi og kupay-kupay sa wala nga paa ni Tessie samtang nagpadayon kini pagparayeg sa iyang partner.

Tabla ra’g duha ka langgam ang naigo ni Ely sa usa lang ka pagpanirador. “Dili na lang ko makigpartner nimo Tess,” giingnan ni Magno si Tessie kay gipasagdan ra man nimo’s Ely nga nagkupay-kupay sa imong paa. (Sumpayan)