Udto na dihang migawas ang duha gikan sa ilang giabangang motel. Igo lang gihatod ni Albert si Vanessa sa gipuy-an niini sa Basak, Mambaling.
Sa pag-abot ni Albert sa ilang balay mingaw na ang palibot. Gihinay pagtukmod ni Albert ang palid sa pultahan ug mainampingon nga misulod. Nagkinto siya nga mihinay pagpaingon sa iyang lawak.
Human makailis mihigda si Albert sa mahunolhunol nga kama. Hugot niyang gipiyong ang iyang mga mata. Matulog na lang si Albert daw sa iya pang hibatyagan ang kalalim nga iyang natilawan kang Vanessa. Mora siya’g gilamat sa pagka-babaye niini. Dili niya ikalimod sa iyang kaugalingon nga mas labaw ang kalipay nga iyang nasinati sa kiliran ni Vanessa kay sa nangaging mga babaye sa iyang kinabuhi. Ug samtang naghunahuna niini, nagakos niya ang iyang unlan.
Wala tuyoa nga nakapangutana si Albert sa iyang kaugalingon samtang naghigda nga naghayang sa iyang kama. Ngano kaha nga gitahan man sa hingpit ni Vanessa ang pagka-babaye niini ngadto kaniya bisan sa kasayoran nga kaslonon na sila si Josheba? -- Sumpayan pa