Ang nakaayo ni Pres. Benigno C. Aquino III kay aduna siya’y political will. Igong gahom, igong kaisog nga mopatuman sa iyang gusto. Sama sa pagpalabang sa gikagubtang RH Bill, nga bisan nakasugat og grabing pagsaway ug pagsupak gikan sa simbahang katoliko ug sa ubang sektor sa atong katilingban, apan nakalusot gayod sa buho sa duha ka balay-balaoranan. Sa tinuoray lang gipaminaw sa mga magbabalaud ang tingog sa Presidente nga ipasar ang maong balaud. Ug kini hingpit nang balaud.
Ug tungod kay aduna siya’y political will, wala siya maminaw sa paghot sa mga obispo sa simbahang katoliko nga kusganong misaway sa maong balaud. Supak man gud ang simbahang katoliko ning maong balaud, ang paggamit sa condom o contraceptives ug uban pang matang sa pildoras nga magpugong sa usa ka babaye o inahan sa pagpanganak pinaagi sa paggamit og contraceptives. Tuod no? Nganong pugngan man ang pagpanganak sa magtiayon nga wala man kini mangayo og pagkaon sa gobiyerno. May katarongan sab ang simbahan ning puntoha. The fetus inside the body of a woman has the right to be born and live happily and meaningfully.
Ang nakaapan lang sa simbahan kay dili maantigong mohatag og hinabang. Maayo lang sa sermon. Gusto sa simbahan nga sila mao kanunay ang hatagan. Nakadungog ba mo nga ang simbahan mihatag og hinabang sa mga nabiktima sa bagyo, lunop ug baha sa nagkalaing-laing dapit sa atong nasud? Wa gayod. Gani ang santo Papa sa Roma igo lang mipadangat sa iyang pahasubo ngadto sa mga nabiktima sa bagyo sa Compostela Valley ug Davao Oriental, nga hangtod karon naghamoy pa sa ilang mga tudlo tungod sa kakulang sa ilang pagkaon.
Ang Dios adunay iyang pamaagi kun unsay padulngan sa tawo. Maayo man gani wala matapos ang kalibotan niadtong Disyembre 21, 2012 sumala sa panagna sa Mayan calendar. Kun natapos pa ang kalibotan, aw, maoy paga-ingnon nga ang kalibotan dili matawag og kalibotan kun wala’y kulukambiyo sa panahon. Sa binayabas pa nga kinatsila, Dios proponi, Dios desponi, ang Dios maoy magpahimutang, ang Dios mao ra usab ang magpahamtang. Kining tanan isandig ta sa labaw’ng makagagahom.