Ang sapatos nga way paris

Ang computer imong gi-repair di gihapon mo-andar Tommy,” mao ni nabasa ni John, teks sa iyang selpon pagtingog karong buntaga. Nanglimpiyo na siya sa iyang motorsiklo, serbis niya pagdawat niya sa teks.  Magtutudlo siya sa Canovara National High School. Ug nag-sideline og pangayo og computer. Ang nag-teks niya karon si Mr. Tomas, principal sa Lipya Elementary School nga nahimutang sa bukirang barangay sakop sa lungsod sa Canovara.

“Akong kuhaon diha ang computer,” balos ni John og teks samtang nagtrapotrapo sa lawas sa motorsiklo nga nagbarog kilid sa terasa sa ilang balay luyo sa munisipyo. Nagsagol ang kapikal ug kalibog sa galamhan ni John kun nganong naguba na sab ang computer sa principal.

“Ayaw lang. Dad-on nako diha karon dayon ang computer sa inyo,” balos teks sa principal.

Alas nuybe pa ang klase ni John. Unya alas siyete pa ron sumala sa wall clock sa ilang sala nga makita ra niya gikan sa iyang nahimutangan. Nakahukom siya nga maghuwat.

Sa niaging semana naayo na ni John ang maong computer.

“Unsa na man sab kahay deperensiya sa maong computer?!” tuaw ni John sa hilom nga nakapangawot sa iyang ulo.

Ang computer personal nga gamit ni Tommy. Iyang gipalit para sa iyang opisina sa saringan.

Sa wa pa nikuha’g kursong Education si John, Computer Engineering iyang gikuha. Maong may nakat-onan siyang gamay’ng trouble shooting sa computer. Nagkaila sila‘s principal duha ka tuig na ang nakalabay dihang may giayo siyang computer sa library sa Lipya Elementary School. Ang librarian nga si Sharon, uyab ni John. Gipaila siya ngadtong Tommy.

Pag-abot ni Tommy sakay sa serbis niyang multicab, gimontar dayon ni John ang computer sa ilang sala. Gi-plug niya sa plaganan kilid sa bongbong. Pag-on niya, niandar ang computer. Way deperensiya. Nagtinan-away sila’s John ug Tommy sa kahibulong.

“Kuyogi hinuon ko sa eskuylahan. Ikaw asembol ug montar sa computer didto. Ikaw say switch on. Tan-awon nato’g di ba gihapon moandar,” ni Tommy.

“Sige, tana” ni John. Mingaw pa ang sala. Kay  natulog pa iyang mga ginikanan nga puro na pensionado. Wala sila’y maid. Bugtong anak si John.

Pagmontar ug pag-on ni John sa computer sulod sa buhatan sa principal, wa gyud niandar. Nakapanglingo si John, nanakla si Tommy.

“Basi’g way power ni imong plaganan” ni John. Giibot niya ang plug sa computer.

Giplagan niya’g bentelador gikan sa kilid sa lamesa sa principal. Gi-on. Niandar ang bentelador. Giibot ni John og balik ang plug sa bentelador. Nakapanglingo si John.  Nihangadhangad. Gilibot ang mata sa tibuok buhatan sa principal.

Tapad sa gimontaran sa computer, dapit sa tuo nagbarog ang lamesa sa principal. Sinaw ang sawog ilawom sa lamesa. Ginamitan og floor wax. Apan may mga abog-abog. Niluta sa abog ang mga tunob sa gamay’ng bata. Gagmay pa ang mga tunob sa tunob sa puya. Sa punoan sa linya sa mga tunob nga puro tuo lang, may nagligdas nga gamay’ng sapatos. Usa lang ka buok. Daw sapatos og monyika. Apan kurba og talinis ang tomoy. Lunhaw, pula ug lalag ang kombinasyon sa mga bulok. Tuo lang nga sapatos. Way paris.

“Akong tan-aw nakadisgrasya tingali ka’g dwende. Sa pagmontar nimo sa computer, naipit o nadat-ugan ba kaha iyang tiil. Naa o. Nahibilin iyang usa ka sapatos,” ni John nga nitikubo ug nitudlo sa sapatos.

“Ay’g komedya diha! Moderno na ta karon. Motuo gihapon ka’g dwende?” ni Tommy.

“Mas moderno pa na sila nato. Kay kamao sila moguba og computer nga way gamit og heramenta,” ni John nangluspad.

Nitikubo si Tommy. Nakita niya ang gitudlo ni John. Naniga iyang mga mata. Nakapanglab-ok og laway.

“Unsa may akong buhaton?” ni Tommy nikanga.

“Pangayo’g pasaylo!” ni John.

Nangluspad ug gipaningot si Tommy. Nitan-aw ni John. Niyango si John niya. Nitalikod si Tommy. Niatubang sa bongbong.

“Ah, maayong buntag ninyong mga tagpuyo dinhi sa akong opisina. Mangayo ko’g pasaylo sa akong sala kaninyo. Di man gud mo makita. Basin tuod og naipit o nadat-ugan mo sa CPU o sa monitor ba kaha pagmontar nako sa computer”, ni Tommy nga nagminghoy.

Hilom ang palibot. Gi-plug og balik ni John ang computer. Gi-on. Niandar na.

“Salamat sa inyong pagpasaylo ni Tommy. Sa sunod higayon, pakit-a siya asa mo agi. Aron hawanan niya  daan inyong agianan,” ni John.

“Ay’g komedya,” ni Tommy. Sagol hunghong nga pinasingka. (Kataposan)