Walay klaro

Dear Tita Salie,

Hello! Tawga lang ko og Roxan. I am still single pero duna koy ka-live in apan naputol ang among relasyon.

Duna koy ka-live in, apan tungod kay dili magkasinabot nagbulag mi. Pero walay klaro ang among panagbulag kay niuli lang ko sa amo aron makadistansya kaniya. Mao usab ang gusto sa akong mga ginikanan kay naluoy sila nako.

Paglabay sa 1 ka semana nakong puyo sa amoa nakauyab ko og lain. Ako kining gibuhat aron makalimtan nako ang akong live-in partner kay nagsige ra man ko og kaguol samtang nahilayo kaniya. Pero ang tinuod gyod, Tita, love na love kaayo nako ang akong partner bisan pa man kun magsige ra mi og away.

After 3 months namong panagbulag nagkita mi pagbalik. Dali ra kaayo nga napukaw ang akong gugma kaniya. Nihangyo siya nga magtipon mi pagbalik. Pero love na sad kaayo ko sa akong bag-ong uyab og  dili sad ko gusto nga masakitan siya. Kay siya gyod ang nitabang nako aron ko maka-move-on.

Dili na usab mosugot ang akong parents nga magbalik mi. Pero love kaayo nako siya bisan man kun wala siya mauyoni sa akong parents tungod lagi kay manapat usab siya kun mag-away mi. Unsa may akong buhaton, Tita? Palihog pasabta ko. Thank you and may God bless you always. -- Roxan

* * *

Hi, Roxan,

 Kanunay gyod mogawas ang problema dinhi kanato kun ang atong kasingkasing ug hunahuna dili magkatakdo sa ilang gusto. Ang kasingkasing nagmahal sa tawo nga supak sa atong hunahuna tungod kay ang hunahuna nasayod nga ang maong tawo hingulata, iresponsable, babaero, bisyoso, minyo na ug daghan pang laing rason aron ang maong lalaki dili gyod angay higugmaon. Apan ang problema kay ang gugma buta. Dili niya makita ang maong mga kamatuoran ug padayon gyod siya sa maong pagbati bisan ang hunahuna nagdumili.

Maoy dapat nimong hunahunaon, Roxan, sa imong kabuotan siya ba gyod ang dapat nimong madawat isip imong premyo? Karapatdapat ba nga siya nga mangulata maoy makaangkon sa usa ka buotang babaye?

Ayaw kalimti pagpangutana ang imong hunahuna kay siya ra gyod ang makasulti kanimo kun unsay tinuod. Ang imong isipan ang nakaila ug nakakita sa kun kinsa ug unsa nga matanga sa pagkatawo ang imong live-in partner. Ayaw pagsalig pag-ayo sa imong kasingkasing kay igo lamang kini sa pagbati dili kini makakita sa tinuod labina kun kini nabutaan na sa gugma. -- Tita Salie