Iyang nakita ni Rigor si Miraflor nga naglingkod sa may lingkoranan nga semento duol sa tugkan sa mga bulak nga Sampaguita. Sayod siyang gihandom na usab niini si Fernando, ang hinigugma niini didto sa ilang dapit sa Manduyong. Matud pa unang gugma ni Miraflor si Fernando.
Gawas niini, iyang katalirungan kini, ug kauban pa gyod niini sa tulunghaan didto sa ilang baryo. Apan kaniya ni Rigor sakit pud hunahunaon nga ang pagpakigminyo ni Miraflor kaniya maingon nga paghanaw sa iyang paghandom sa namatay niyang hinigugma kanhi. Oo, sayod siyang hangtod karon si Fernando pa gihapon ang naa sa kasingkasing ni Miraflor.
Alang kaniya wala siya’y mahimo basta kay mahal niya si Miraflor ug buhaton niya ang tanan aron lang malipay kini. Ug kay daghan siya’g kuwarta wala’y problema si Miraflor sa hangyoon niini kaniya. Gani, sa ilang Honeymoon didto sa Bali, iya gyong gipakita kang Miraflor ang pagmahal niya niini bisan luyo sa tanan nga si Fernando dili pa malaksi sa iyang kasingkasing ni Miraflor.
“Sama kang Fernando, makamao ka usab nga motugtog sa piyano, Rigor,” ni Miraflor pa usa ka hapon niana dihang naabtan niini ang iyang bana.
“Oo, kamao kong mopiyano, apan dili ako si Fernando,” may pahiyom si Rigor nga hilaw nga iyang giluwatan. “Guwapo si Fernando ug layo ra kaayo kun itandi sa iyang hitsura ug bayhon...”
“Maayo kadtong moawit si Fernando, Rigor,” ni Miraflor nga milingkod sa sopa.
“Hangtod ba karon nga may anak na kita, Miraflor, si Fernando lang gihapon ang naa sa imong kasingkasing? Ako diay, wala na ba gayo’y luna sa imong dughan. Bana ko nimo, di ba? Okey lang, pero kataw-anan kun magsige ka’g ingon ana, patay na man unta si Fernando, dugay na. Nadugta na siya ilawom sa yuta....” Wala si Rigor motan-aw kang Miraflor. Kahilakon siya apan iya lang gipugngan. Unya mibalik si Rigor sa pagtugtog, ang iyang gitugtog mao ang awit nga gipasikat kaniadto ni Tony Bennett, ang Cold Cold Heart.... ug samtang nagtugtog iyang gidunganan sa pagkanta, ang mga liriks nagkanayon: I’ve tried so hard my dear
To show that you’re my everything
Yet you’re afraid each thing I do
Is just an evil scheme
A Memory from your lonesome past
Keep us so far apart
Why can’t I free your doubtful mind
And melt your cold, cold heart...
Unya pagkahuman niya’g awit, mitindog si Rigor ug miduol kang Miraflor ug iyang gipatikan og halok ang mga ngabil niini. Medyo miantihay og gamay si Miraflor apan nahagkan na siya sa iyang bana.
“Ako ang ipadala sa among kompaniya ngadto sa Switzerland. Sa Sabado kini, Miraflor, ug niini, mahilayo gyod ako sa dugay nga higayon,” hinay ang tingog ni Rigor.
“Pila ka buwan didto, Rigor?” nangutana si Miraflor.
“Duha ka tuig,” kalma ang tingog ni Rigor.
“Du-duha ka tuig? Ka-kadugay...”ingon sa nakurat si Miraflor.
“Oo, duha ka tuig, ug nalipay pod ko, Mira, aron wala nay magtan-aw kanimo nga maghinuktok kanunay kay naghandom kang Fernando. Dili na sab ko sakitan. Tawgan na lang unya tika sa cell phone...”Ug mitindog si Rigor aron mosulod na sa kuwarto. Kalit usab nga mitindog si Miraflor nga may mga luha ang mga mata. Unya namulong kini.
“Rigor, nakat-on na ko pagmahal nimo, dugay na. Ug karon mobiya ka hinuon nako sa ingon niana ka gidugayon. Imo ba kong patyon sa kaguol, ha? Mahal ko ikaw ... ug si Fernando, wala na, kay ikaw na ang nia ning akong kasingkasing...”Ug gigakos ni Rigor si Miraflor kinsa hugot usab nga migakos kaniya. (Katapusan)