“Hala uy, nganong miuban man ko nimo dinhi Sam?” matud ni Triz nga ingon sa nagmahay nga mikuyog siya kang Sammy sa gisudlan nila nga motel. Apan giam-aman siya ni Sammy.
“Ayaw na pagmahay Triz, dia na kita dinhi sa sulod. Lisud kaayo ang atong sitwasyon didto sa awto,” matud ni Sammy nga misugod na usab sa pagparayeg kang Triz. Bisan og kabalibaron apan wala nay nahimo si Triz aron pagsanta ni Sammy.
Giparaygan pag-ayo ni Sammy si Triz. Hangtud nga iya kining gipahigda paghinay sa hunol-hunol nga higdaanan ug gipatagamtam sa kalami sa pagparayganay.
Nakabantay si Sammy nga gipiyong na ni Triz ang iyang mga mata dungan sa pagginhawa og lawom. “Sammy…Sammy, Sammm,” ni Triz pa nga daw gisanapan na sa kalalim sa mga parayeg ni Sammy.
Natuman g’yud ang tinguha ni Sammy ngadto sa maanyag nga fuel pump girl taliwala sa mahunol-hunol nga higdaanan. Human sa ilang kumbati, nakita ni Sammy nga naghinuktok si Triz, dayon mitiyabaw.
Natagbaw og alam-alam si Sammy kay mibakho pag-ayo si Triz nga naghuna-huna sa iyang gidangatan. “Ulitawo ka pa ba gud Sam? Minyo ka na no?” gipangutana ni Triz si Sammy.
Wala limdi ni Sammy si Triz nga duna na siya’y pamilya. Misamot pagtiyabaw si Triz nga nakadungog sa gisulti ni Sammy. Midanguyngoy kini pag-ayo.
“Naglaum sila si Papa ug Mama nga makatabang ko kanila sa pagpatungha sa akong mga manghud apan nadisgrasya na hinuon ko,” matud ni Triz sa nagkurog niya nga tingog.
Natandog kaayo si Sammy. Gusto pa unta niya nga tagbawon ang iyang kaugalingon uban ni Triz apan gidaug siya sa kaluoy. Gihatagan ni Sammy og P10,000 si Triz ug gipasaligan nga pasudlon og trabaho sa iyang kompaniya.
Walay nahimo si Sammy… nanggawas sila sa gisudlan nilang motel. Gihatud niya si Triz nga didto nagpahatud sa duol sa JY Square. Gipatikan pa og hawok ni Sammy si Triz sa dayon niining kanaug sa awto.
Pagkaugma, giagi ni Sammy si Triz sa gitrabahoan niining gasoline station samtang paingon siya sa opisina, apan nasayran niya nga wala mo-duty ang dalaga.
Gibalik niya pagka-ugma apan nasayran na lang ni Sammy nga mi-resign na diay si Triz sa iyang trabaho ug nagbilin og suwat uban sa tugon nga ipahatag kini kaniya kun mobisita siya.
Sa suwat, gimahayan pag-ayo ni Triz ang nahitabo kaniya. Diha masuta ni Sammy ang kabuotan ni Triz, ang maanyag nga fuel pump girl nga naangkon niya tungod sa gihatag niya nga tip atul sa pasko.
Haw-ang kaayo ang gibati ni Sammy nga mibiya ug wala na gayud magpatubil pa sa mao nga gasoline station. (Kataposan)