Gula 3
Mipahiyom si Triz dihang nadungog niya nga mi-admire diay si Sammy sa iyang beauty.
“Duna ka na ba’y boyfriend Triz?” gisukna ni Sammy ang dalaga. Abtik kaayo kini nga mitubag nga wala na siya’y boyfriend. “Zero lagi ko karong paskoha Sam… mao bitaw nga wala ko managana sa pag-uban nimo kay wala may masuko.”
Nakahuna-huna si Sammy nga sakyan dayon ang maong kahigayonan ug ipaagi lang niya kini sa komedya. “Kun mao kana, tayming diay kun manguyab ko nimo Triz? Ayaw na lang huna-hunaa ang gintang sa atong pangedaron,” matud ni Sammy.
Giobserbahan ni Sammy ang panagway ni Triz kun may paglaum ba siya. Iyang nakita nga gipaak ni Triz ang iyang mga ngabil sa wala pa taboni ang iyang baba sa tuo niya nga kamot.
Apan nakita ni Sammy nga nagpahiyom gihapon si Triz. Wala na g’yud lung-i ni Sammy ang dalaga. “Ang imong panagway Triz susama g’yud sa kinaham nako nga artista sa TV,” matud ni Sammy, dala nga ulog-ulog sa dalaga.
“Daghan bitaw ang miingon nako nga gwapa kuno ko Sam,” dason ni Triz. Gitug-anan ni Sammy si Triz nga dugay na siya nga nakabantay sa iyang kaanyag apan gipaabut lang niya ang pasko aron kini iyang mahigala ang dalaga.
Samtang nangaon sila, gisukit-sukit ni Sammy si Triz ug nasayran niya nga gamay ra diay kaayo ang sweldo niini isip fuel pump girl. “mao bitaw nga miingon ko nimo nga ang imong gihatag nako nga pinaskohan mora’g usa na nako ka kinsena nga sweldo,” matud ni Triz.
Igo ra nga nakahuman si Triz sa second year sa iyang kurso nga education. Wala na siya makatungha tungod sa kalisud. “Kun gusto ka, patrabahoon tika sa opisina isip usa sa akong mga staff,” giingnan ni Sammy si Triz.
“Tinuod ka sir?” nahinangop kaayo si Triz nga nakadungog sa tanyag kaniya ni Sammy. Migunit si Triz sa bukton ni Sammy sa kalipay. Daw nanginit ug nakorentehan ‘sab dayon ang kalawasan ni Sammy nga gigunitan sa dalaga.
Mibawos paggunit si Sammy sa bukton ni Triz ug gitutokan ang dalaga. “I love you Triz.” Nagtinutokay silang duha ug nasabot ni Sammy nga paraygon na kaayo ang tinan-awan ni Triz kaniya.
“Tana, mangita ta og laing kasuroyan Triz nga malingaw ta,” matud ni Sammy nga miuna sa pagtindog gikan sa ilang gilingkoran.
Mipaingon sila sa kotse ni Sammy. Si Sammy pa ang miabli sa pultahan sa passenger’s seat sa pangunahang bahin sa awto ug gipasakay si Triz, usa pa misulod si Sammy sa sakyanan.
Nagtinutokay na usab silang duha. (Sumpayan)