Baog kuno

Dear Tita Salie,

Good day ug kumosta? Usa  ko sa liboan nga taga subaybay sa imong column. Nasayod ko nga daghan gyod ang nagsunod sa imong lindog, Tita, kay ganahan man gyod mi mobasa sa imong mga tambag.

Tawga lang ko og Ms. Leo, dili pa minyo apan duna ko’y live-in partner sulod na sa 2 ka tuig. Gusto na gyod unta mi nga magkaanak kay nasayod ko nga makalingaw gyod ang bata ug para nako mosamot gyod kalig-on ang samahan namo kun duna nami’y anak. Apan tungod lagi kay dili man ta makabuot sa Diyos mao nga igo lamang kami sa paghulat og labina ako nga gamay na lang ang pagtan-aw sa akong partner kanako kay wala man nako siya kahatagi og anak.

Ang akong problema, Tita, kay magsige na lang og kahubog ang akong partner. Masal-angan ra og usa ka adlaw nga dili siya mahubog. Unya kun mag-away mi iya dayon kung ingnon nga magbulag na lang tungod kay wala ko’y pulos nga babaye kay wala ko kahatag og anak kaniya. Ang tawo kuno nga baog walay hinungdan ug angay lang kuno biyaan.

Ako lang gidawat ang iyang gipanulti bisan kun sakit kaayo, Tita, tungod kay mahal kaayo nako siya ug dili ko gusto nga magkabulag mi. Naa pa kaha siya’y gugma kanako, Tita? Unsa may akong buhaton aron dili siya mawala kanako? Palihog pasabta ug tabangi ko. Daghang salamat sa imong pagtagad. -- Ms. Leo

* * *

Dear Ms. Leo,

 Sa akong tan-aw, naingon niana ang imong bana tungod kana sa iyang mga frustrations nga gusto na siyang makakita og iyang liwat. Tungod sa iyang frustrations iyang gipagawas pinaagi sa pag-inom-inom og makahubog. Iyang gilingaw-lingaw ang iyang kaguol pinaagi  niining buhata. Nawad-an na siya og gana kay nawad-an siya og paglaom nga makabaton mo og anak.

Sa sitwasyon karon sa imong bana, makaingon ka nga unfair siya tungod kay ikaw lang ang iyang gi-blame. Dapat niyang hinumdoman nga dili mahimo ang bata kun mag-inusara ka lang. Kinsay nasayod naa sa imong bana ang problema ug wala kanimo.

Pero sakto ang imong gibuhat, Ms. Leo. Ayaw na lang siya baliha og away tungod kay kun buhaton nimo kini mas modako ang inyong problema kay mosamot man unya ang iyang kasuko. Mas maayo nga nagpaubos ka lang.

Sa sitwasyon karon sa imong bana, nagkinahanglan siya og asawa nga mosabot kaniya ug anaa kanunay sa kiliran aron mo-comfort niya. Wala siya magkinahanglan karon og asawa nga isog ug andam mosukol sa panahon nga magyawyaw ang imong bana.

Sayo sa kaadlawon, samtang bugnaw pa ang iyang ulo, pakig-estoryahe siya. Inyong suwayan nga kamong duha mag-ampo ug mangayo sa Diyos nga unta hatagan mo diha og anak. Kay ang bata o kinabuhi gasa kini gikan sa langit. Tun-i siya nga molaum ug mosalig sa gahom ug kaayo sa Diyos. -- Tita Salie