Dugay ra nga si Sammy nakamatikud sa kaanyag sa usa ka kawani sa gasoline station sa Salinas Drive nga suki niya sa pagpatubil og gasolina. Gani dunay mga higayon nga bisan daghan pa’g gasolina ang iyang sakyanan apan magpatubil lang gihapon siya aron makita ang gwapa nga gasoline girl.
Nagsingabut na ang pasko, nakahuna-huna siya og paagi nga masuod niya ang maong kawani sa gasoline station. Pagsulod ni Sammy sa compound sa gasoline station, gilantaw na niya’ng daan kun hain nga gas pump magpahimutang ang iyang naibgan nga “gasoline girl.”
Didto g’yud siya miparada sa iyang sakyanan. Gisugat dayon siya’g pahiyom sa gwapa nga kawani sa gasoline station. “Merry Christmas sir.” Nanaug g’yud si Sammy sa iyang kotse ug mitupad sa maanyag nga dalaga. Lapaw lang og gamay sa iyang abaga ang maong babaye. “Premium miss, unya i-full tank,” giingnan ni Sammy ang babaye.
Samtang gitubilan na’g gasolina ang iyang sakyanan, gipahimuslan ni Sammy ang higayon. “Dugay na ko nga nagsige’g patubil dinhi apan wala pa ako makaila nimo miss,” giingnan ni Sammy ang babaye nga nakita niya nga mipahiyom.
Miatubang kini kaniya aron makita ang name plate nga diha sa iyang dughan. “Triz diay ang imong ngalan?” matud ni Sammy. “Beatriz g’yud ang akong ngalan sir, pero Triz ang tawag nako sa akong mga amiga,” ni Triz pa. Nalipay kaayo si Sammy nga gikaila na g’yud niya ang maong gwapa nga gasoline girl. “Wala ba mo’y kalendaryo para sa inyong mga customers Triz?” matud ni Sammy. Giingnan siya ni Triz nga walay kalendaryo ang gasoline station.
“Sige, ako na lang hatag nimo og pinaskohan, oki ra ba nimo?” matud ni Sammy. “Sige sir, tinuod ka sir?” daw naglukso-lukso sa kalipay si Triz. Gikuha ni Sammy ang giandam niya nga pula nga sobre nga diha sa iyang bulsa sa gisul-ob niyang T-shirt.
“Imo kini Triz, special na nako para nimo….unya ikaw na’y hatag aning laing mga sobre sa tulo nimo ka kauban ,” ni Sammy pa. Gituyo ni Sammy nga wala dayon mangayo sa contact numbers ni Triz aron dili kaayo halata nga may kaibog siya sa dalaga.
Bisperas sa pasko, mibalik na usab si Sammy sa gasoline station aron magpatubil. Wala na siya mangita pa ni Triz, apan iyang nakita nga ang dalaga na maoy nagdali nga miduol kaniya. Nagpahiyom ang ubang kawani sa gasoline station nga miduol ni Sammy.
“Salamat kaayo sir sa imong gihatag ha?,” matud sa mga babaye. Taud-taud diha na si Triz sa iyang atubangan. “Lipay kaayo ko sa imong gihatag sir.. mora man og sweldo nako.” (Sumpayan unya sa Huwebes)