Gula 40
Gisuka ni Albert ang tanang sulod sa iyang tiyan.
Dihadiha midali pagtindog si Eking ug miduol kaniya.
“Nasobrahan tingali ka, Brod Al,” ni Eking pa. “Medyo daghan ka na man gud og nainom. Hubog ka na. Mangundang na ta pag-inom og beer, Brod.”
Giagak ni Eking si Albert paingon sa lingkoranan human siya makasuka.
“Dinhi ka lang, Brod,” matud ni Eking. “Tawgon ko ang imong mama, ha.”
Ug dihadiha, midali pagtalikod si Eking ug mipadulong sa kusina.
Nahabilin si Albert sa sala. Miliraw ang iyang mga mata. Bug-at ang iyang mga tabontabon. Gipiyong ni Albert ang iyang mga mata. Apan ang iyang kinumo nagpanumbag sa hangin. Mikagot ang iyang mga bag-ang. Apan wala siya masayod ni makasabot kun unsay tinuod niyang gikalagotan.
Misulay pagtindog si Albert. Apan dili niya makaya. Wala siya makadaog sa iyang kaugalingon. Wala siya makapanimbang. Misukarap siya ngadto sa lamesa sa iyang atubangan. Nasaghiran ni Albert ang mga baso ug botelya. Mikagay kini nga nangahulog ngadto sa salog.
Wala madugay, nahiabot si Nang Gloria nga naghangos gikan sa kusina. Ug si Eking nagsunod niini.
“Albert, unsa na man kana?” matud ni Nang Gloria nga midali pagduol sa iyang nahimutangan. -- Sumpayan pa