Goodbye is not Forever
Mora’g misaka ang tanan niyang dugo sa iyang utok. Napiyong ni Albert ang iyang mga mata. Nanakmol siya. Mipaspas ang butokbutok o kakulba sa iyang dughan.
Nganong karon pa man sila makahunahuna niini? Sakto si Eking. Kun magluib si Josheba kaniya, wala na siya’y dag-anan. Kun ugaling makig-relasyon si Josheba didto sa Canada og laing lalaki ug may mahitabo unya kanila samtang layo kini kaniya dili na siya makaila ug makahibalo tungod kay dili na man kini virgin. Siya ang nakabuak sa pakwan ni Josheba.
Wala sa hunahuna nga gitungab ni Albert ang tanang beer nga sulod sa iyang baso. Unya ang wala nay sulod nga baso iyang giipisan og beer gikan sa iyang botelya. Giyarok na usab niya ang tanang beer nga sud sa baso.
“Pasensiya na, Brod Albert. Pasayloa ko,” ni Eking paglabay sa pipila ka daklit, “sa akong nabuhat o gisugyot kanimo.”
Wala motingog si Albert. Miinom siya sa taman sa ginhawa. Ingon gani sa wala siya makamatikod sa iyang higala nga namulong.
Miutong ang mga gutlo sa kahilom. Si Albert gitinubig lang pag-inom ang beer.
Unya, kalit lang naglain ang ginhawaan ni Albert. Mora’g dihay nagpanikad sa iyang kahiladman, buot mogawas sa iyang baba. Kasukaon si Albert. Midali siya pagdagan paingon sa bentana.-- Sumpayan pa
- Latest
