Goodbye is not Forever
Gula 37
Wala motingog si Eking. Giipisan niining beer ang baso nga gigunitan. Human mapuno, gidiretso kini’g tungab sa lalaki hangtod nahurot ang tanang beer nga sulod sa baso.
“Unsa lagi ang buot mong isulti kanako, Brod Eking?” Miusab pagpangutana si Albert.
Mitutok si Eking kang Albert. “Gi-gibuhat mo ba ang...” gituyo ni Eking ang dili pagtiwas sa buot niyang isulti.
“Ang gisugyot mo kanako nga buhaton kang Josheba?” salo ni Albert nga ingon sa nakaagpas sa buot ipasabot sa iyang higala.
Miyango si Eking. Unya midugang siya pagpangutana, “gibuhat mo ba?”
Wala motingog si Albert. Igo lang siyang mitutok kang Eking sa tinan-awan nga ingon sa nagatugkad sa matuod nga gibati sa iyang higala. Unya mitungab siya sa beer nga diha sa iyang baso.
“Sa wala pa molarga si Josheba,” ni Albert pa human ibutang ang wala nay sulod nga baso sa ibabaw sa lamesa, “nagsabot na kami. Wa nay problema mahitungod niana. Inigpauli niya, magpakasal na kami.”
Salabtonon kaayo ang sinultihan ni Albert. Ug dili bogo si Eking nga dili makasabot sa mga pulong niini.
“Sayop ang nahunahunaan natong paagi, Brod,” pintok nga pamulong ni Eking dungan ang pagpaak sa ubos nga wait. -- Sumpayan pa
- Latest
