121 Prenza, Argao Cebu
Sud sa hospital. Busy kaayo ang mga doktor, nars ug Interns sa pag-asikaso sa mga pasyente nga nag-abot-abot nga nabiktima sa mga pabuto sa Pasko. May nabuthan sa mata, dunggan, ilong, baba ug kamot nga natangtang ang kuyamoy.
Alas-otso pa lang gani sa gabii nagdasok na ang emergency room sa mga pasyente nga nanaghilak, nanagping-it, nanagsyagit tungod sa kasakit sa nabuthang parte sa ilang lawas.
Way hunong ang siren sa mga ambulansya nga naghatud sa mga biktima. Nagtulo-tulo ang mga dugo sa sawog. Ang talan-awon morag esena sa ikaduhang giyera sa tibuok kalibotan. Nanagbarug na lang ang ubang pasyente kay wa nay kahigdaan ug kalingkoran. Ang uwahing mga nangabot di dayon matambalan kay kulang ang mga doktors, nars ug interns sa ilang kadaghan. Dihay nangluspad ug nakuyapan. Ug usa sa mga nabuthan si Dong Pikong.
“Giingnan ta bitaw ka, Dong Pikong, nga ayaw’g palit og pabuto, tan-awa unsay gidangatan nimo, ari nuon ka sa hospital mamasko,” sa Mama Cita ni Pikong nga magul-anong mikasaba kaniya.
“Wa bitaw ko namalit og pabuto, Nay. Bakus man tong akong gipalit,” luyang tubag ni Pikong naghigda sa straight chair, nag-oxygen ug gi-dextrosan.
“Unsay wa nga nabalbag man lagi nang hawak nimo, lagi. Hapit ka na man gani mahimong manananggal,” sulirap sa inahan.
“Tungod lagi ni sa bakus akong gipalit, Nay. Mibuto man, Nay?” mitibi si Pikong.
“Mibuto? Unsa man diay ngan adtong bakusa imong gipalit, Dong?”
“Judas belt man kuno to, Nay. Ingon ang tindero sa aseras,” ni Pikong uban ang pagdagayday sa iyang mga luha. (Kataposan)