Goodbye is not Forever Gula 34

Daghang mga gabii nga kaadlawon na nga makatulog si Albert. Kanunay nga mohadla sa iyang handurawan si Josheba sa mga takna sa iyang pag-inusara sa higdaanan. Ug bisan sa mga takna nga busy siya sa daghang buluhaton sa call center si Josheba mokalit lang og duaw sa iyang panumdoman ug moilog sa iyang kahimungawong. Usahay mahunong siya sa iyang gibuhat nga wala sa kaugalingon. Maghinuktok.

A, maanad ra ako sa kadugayan. Gialam-alaman niya ang iyang kaugalingon. Ginayanaya niya ang iyang gibati. Gipaningkamotan niya nga malingaw sa iyang mga bulohaton ug dili na magpunay og hunahuna sa hinigugma. Gipatuo niya ang iyang kaugalingon nga ang tulo ka tuig kadali ra nga matapos ug mobalik na si Josheba sa Pilipinas.

Paaboton na lang niya ang pagpauli sa iyang hinigugma.

Usa ka adlaw niana, miduaw si Eking kang Albert. Ingon sa buot kining magsusi sa iyang kahimtang human makalarga si Josheba ngadto sa Canada. Gikahinangop ug gikalipay pag-ayo ni Albert ang pagbisita sa suod niyang higala kaniya. Gilaayan siya ug gusto siya nga adunay ika-estorya.

“Kumosta ka na man Brod?” ni Eking sa dihang nag-atubang na sila pagpanglingkod sa sopa nga nahimutang sa sala. Diha sa ibabaw sa lingin nga lamesa gipahimutang ang unom ka botelya sa beer. -- Sumpayan pa