Ang pagpanigarilyo di lang makahatag og sakit sa tawo. Makamatay pa gyud! Sayod ang mga doktor niini. Hibawo sab ang atong gobiyerno. Gani, nagbuhat man sila’g balaod nga gidili ang pagpanigarilyo. Apan makahibulong. Kay sa kadaghang magpabuhot og aso sa mga pambublikong lugar, bisa’g usa wala pay nadakpan ug napriso. Seryoso ba ang atong balaod niini, o nagtiawtiaw lang?
Makalibog. Dakpon kuno ang manigarilyo. Unya, naghimo’g laing balaod ang atong mga lider nga patunga’g buhis ang matag kaha sa sigarilyo. Naglalis pa unsay maayo? Patas-an ang kantidad, o paus-osan? Sa ato pa, wa diay gidili ang pagpanigarilyo? Kay kun gidili pa, dili na unta mangayog buhis ang gobiyerno. Ipahunong na dapat ang produksiyon niini. Unta, dugay na. Kun gusto gyud sila!
Ang pagpanigarilyo usa ka buhat nga hinayhinay’ng mopatay sa kaugalingon ug sa atong isig ka tawo, kinsa makahingos usab sa aso nga gibuga ta sa kahanginan. Sama kini sa hilo nga giinom ug gipainom sa tagbuhat. Dugay lang tuod ang epekto. Pero, makamatay gihapon. Busa, gikonsiderar nga usa ka criminal act. Nan, kay criminal act man...angay lang prisohon ang manigarilyo. Ug duna na bay nangapriso?
Angay’ng hinumdoman...nga kining pagpanigarilyo nakasupak sa ikaduhang sugo sa Ginoo nga nagkanayon: “Higugmaa ang imong isig ka tawo sama sa paghigugma sa imong kaugalingon.” Nga sa ato pa, angay ampingan sa tawo kining kinabuhi nga hinatag-gipahulaman gikan sa atong Magbubuhat. Obligasyon nato ang pag-amping-linis niini sa tanang higayon aron dili mataptan sa sakit nga makamatay sa lawas ug kalag. Busa, kun mangutana ang mga gahig ulo: “Sala ba ang pagpanigarilyo?” Yes, smoking is a mortal sin! Tiaw bay, magbuhat ka’g impiyerno nga makasunog sa imong baga ug sa baga sa uban?