Kun aduna kay gitanom kay pupuon

Muadto ko sa Catmon ugma sa buntag,” pahibalo ko sa akong asawa.” Duawon ko ang mga tanom sa yuta nato didto.” “Kinsa man ang imong kauban pag-adto didto,” pangutana niya.

“ Si Ken ang akong iuban kay day-off man niya ugma,” tubag ko.

“Pagdala og bodbod kabog unya sa imong pagbalik,” tugon niya.

“Oo, dili ko malimot,” pasalig ko kaniya.

Misakay kami ni Ken sa Ceres Bus sa alas otso sa buntag ug nahiabot kami sa Catmon mga alas onse na sa buntag. Didto kami abot sa akong ig-agaw nga mao usab ang nagbantay sa yuta.

“Komusta Gaw. Karon pa man lagi ka mibalik.”

“Duna ko’y daghan nga giatiman didto sa siyudad,” matud ko. Karon lang ako nakalugar pag-anhi.” Komusta man ang akong gitanom nga mga punoan sa bayabas, nangka ug mga saging?

“Dagku na og pila ka bulan mamunga na.”

“Maayo hinoon.”

“Gaw, kining akong kuyog mao ang akong anak nga si Ken,” paila ko.

“Ulitawo na man diay imong anak,” matud niya. Liwat gayud nimo. “Pila man diay imong anak, Gaw”?

“Lima ni sila ka buok,” tubag ko. “Ang kamanghuran, lima ka tuig na. Mihunong na sa pag-anak ang akong asawa. Igo na. Kay lisud ang panahon karon.”

“Moadto diay kami sa lungsod kay mopalit kami ni Ken sa gitugon sa akong asawa nga bodbod kabog,” pananghid ko sa akong ig-agaw.

“Naa na ninyo mapalit sa carenderia duol sa Naghalin Bridge,” matud niya.

“Salamat kaayo, Gaw. Dili na lang kami mohapit diri. Molahos na lang kami sa siyudad”.

“Pag-ayo ayo Gaw.

“Mobalik ako diri Gaw. Igo-igo usab nga mahinog na ang mga bunga sa akong gitanom.”

“Kung duna kay gitanom duna gayud ikaw nga pupuon” matud niya.

“Husto ka gayud, Gaw.

“Mao na Ken nga samtang bata pa magtanom og mga prutas sama sa mangga kay lima ka tuig mamunga na kung marcotted,” giingnan ko si Ken.

“Asa man sab ta mopalit ug itanom, pa,” matud ni Ken.

“Sa plant nursery sa Mandaue” tubag ko kaniya. “Adunay daghan nga igtatanom nga mga prutas. Duna ka unya mapupo nga mga bunga nga inyong makaon ug ang uban ibaligya.”

Misakay kami og tricycle ug nagpahatud kami sa baligyaanan sa bodbod kabog nga sinugatan sa akong asawa. (Katapusan)