Gula 6
Grabeng kasaba ang nahiaguman ni Clarissa gikan sa iyang mga ginikanan. Apan bisan pa niini, wala kini makapugong kaniya nga makigkita pag-usab ni Martin nga iyang boyfriend.
Gani ang nahitabo kanila didto sa mingaw nga dapit sa barangay Sapangdaku, nasundan pa og laing mga higayon. Usa ka higayon, duna’y project nga gihimo ang mga tinun-an sa fourth year high school mao nga nakahigayon na usab sila.
Nanglabay ang mga adlaw, semana ug mga buwan. Nagbunga ang kinawat-kawat nila nga gihimo. Gibaliwala na lang ni Clarissa ang kasaba gikan sa iyang mga ginikanan. Misuway pagbisita kaniya si Martin, apan nadagmalan hinoon kini sa iyang Papa.
Miundang si Clarissa sa iyang pagtungha tungod kay nauwaw siya sa iyang gidangatan. Klaro na kaayo ang iyang tiyan. Dili usab siya mahimong magpakasal kang Martin kay pulos sila mga menor de edad.
Miabut ang bakasyon ug wala na gayud sila magkakita si Martin ug si Clarissa. Grabeng pag-antos ang iyang nahiaguman kay gipasagdan ra si Clarissa sa iyang inahan. Siya-siya ra gani ang moadto sa barangay health center aron magpa-prenatal.
Miabut gayud ang higayon nga gipahimugso ni Clarissa ang liwat nila ni Martin. Sa hilom, maghilak si Clarissa tungod sa mapait nga kahimtang nga iyang nahiaguman. Gibasul niya ang iyang kaugalingon kun nganong wala gayud siya makabalibad kang Martin.
Gipasiklapan ni Clarissa ang relo sa bungbong sa ilang balay ug nakita niya nga lapas na sa alas dos sa kaadlawon apan padayon pa nga naghasol ang iyang anak. Mohilom lang og kadiyot kun iyang isayaw-sayaw ug kugoson ang bata, apan taud-taud mohilak na ‘sab.
Luya na kaayo si Clarissa kay mga unom ka oras na siya nga nagsige lang og kugos sa iyang anak. Samtang gisayaw-sayaw ni Clarissa ang bata, nagtibi ang iyang mga ngabil samtang padayong nangambak ang luha sa iyang mga mata.
Nagbakho si Clarissa ug gisanapan sa luha ang iyang mga mata. “Nakatulog na ba ang bata?” nakurat si Clarissa pagkadungog sa tingog nga gikan sa iyang luyo. Wala diay masirad-i ni Clarissa ang pultahan mao nga nakasulod ang iyang Mama.
“Mao na kana ang resulta sa pagpakabuang Clarissa. Nalooy ko kanimo apan gituyo nako nga wala ko magtagad bisan sakit sa akong balatian kay aron makamatngon ka sa imong sala,” matud sa inahan ni Clarissa.
Misamot pagbakho si Clarissa ug nangayo’g pasaylo sa iyang nahimo. Gihapuhap sa iyang inahan ang iyang buko-buko. “Adto ta mag-estorya sa kusina kay aron makainom ka usab og init nga gatas kay maayo nga nakatulog na ang bata,” matud sa iyang inahan. (Sumpayan)