Dear Tita Salie,
Maayong adlaw kanimo, Tita. Manghinaut ko nga maayo kanunay ang imong panglawas ug ilikay ka unta sa mga sulay.
Tagoa lang ko sa pangalan nga Cecil, of Cordova Cebu. Minyo ko ug dunay anak nga usa kabuok. Malipayon kaayo mi sa akong pamilya ug walay mga butang nga akong ikasaway sa akong bana. Pinangga mi niya uban ang akong anak bisan usahay dunay mga ginagmay nga lalis ug walay pagsinabtanay. Apan dali ra usab mawagtang tungod kay amo man dayong sulbaron ang among problema.
Ang akong problema karon, Tita, kay nahigugma ko sa akong ka-textmate. Pagsugod sa among communication kay taudtaod na man pud mi nga nagteksanay, pulos lang binuang ang unod sa among text, ang akong tuyo nga malingaw lang ko pawagtang sa kalaay.
Apan nagkadugay ang among communication na-develop na man hinuon ko niya. Ug iya kong lodan permi aron kuno dili maputol ang among pag-text-text. Pero nahigugma nako niya, Tita, ug matud niya nga pareho ang among gibati. Nakita na usab nako siya sa facebook ug nisamot ko og ka-inlove kaniya.
Unsa may akong buhaton, Tita? Palihog pasabta ko. Thank you very much and more power. -- Cecil
* * *
Everdearest Cecil,
Tam-is kaayong pamation ug tagamtamon kun kita ma-inlove. Colorful kaayo ang kinabuhi kun kita inspired tungod kay dunay naghatag kanato og inspiration. Apan sa tawong minyo dili na maayo kun kita ma-inspired pa tungod sa laing lalaki. Kun kita ma-inspired man ugaling dapat sa atong mga anak, sa atong bana o sa atong pamilya.
Cecil, ayaw kalimti nga minyo ug pamilyado ka na, kun malinawon ug malipayon ang imong pamilya karon ayaw intawon kini og gub-a ug ayaw hugaw-hugawi. Ayaw usab gub-a ang kaugmaon sa imong anak ug ayaw abosuhi ang kabuotan sa imong bana. Nasayod ka nga dako kaayo ang pagsalig sa imong bana diha kanimo, busa, ayaw intawon siya himuang bangis ug wa nay salig kanimo.
Busa undanga ang buhat nga walay ikahatag nga maayo ngadto sa imong pamilya. Please stop being selfish and consider the goodness and welfare of our family. Kun naglingaw-lingaw ka dili kana bagay kanimo nga lingaw-lingaw tungod kay dako kaayo ang possibility nga matungpag ang inyong pamilya nianang imong buhat. I-delete dayon ang cell number nianang imong textmate ug ayaw na tubaga ang iyang mga messages samtang dili pa bug-at ang imong problema. -- Tita Salie