Goodbye is not Forever

Gula 25

“Daghan didtong matahom nga mga butang. Mga hamugaway ang namuyo didto. Dako’g purohan nga mausab ang pagtagad mo kanako,” nagkanayon si Albert.

“Gipakaingon ko ba’g nagkasinabot na kita ug misanong ka na sa akong plano nga muadto sa Canada?” ni Josheba pa nga ingon sa nahimangod. Mitibi ang dalaga. May mga luha nga nanubod sa mga mata niini. Gitay-og ang mga abaga sa dalaga sa subsob nga pagbakho. Mikurog ang iyang dughan.

Migakos si Josheba kang Albert. Miumod kini sa dughan sa ulitawo. Daw buot ipabati sa dalaga ngadto kang Albert ang katiunay sa iyang gugma ug ang kainit sa iyang pagmahal aron paghupay sa kabalaka nga misaog sa ulitawo.

Apan ang kahadlok ug kabalaka sa umaabot nilang panaglagyo nagpadayon pagdinumogay didto sa sulod sa dughan ni Albert. Nahisama karon sa yuta sa panggubatan ang iyang kahiladman nga gipanagsangkaan sa nanagsuhag nga mga pagbati.

Gigakos ni Albert si Josheba. Hugot niyang gibilanggo sa iyang mga bukton ang dalaga. Mitiurok silang duha sa maong kahimtang. Sama sila sa naglutaw sa hangin uban sa mga panganod. Sa kahugot sa ilang panaggakos, ingon sa mabati nila ang pinitik sa ilang kasingkasing.

Taudtaod gayod sila sa ilang kahimtang. Sa dihang nahibalik na ang ilang kahiamgo, inanay nilang gibuka ang ilang mga mata. Nagtinutokay sila. -- Sumpayan pa