Tinalikdang debuynas

Adlaw sa 1M Nationwide Raffle Draw sa kasino. Ang premyo usa ka milyon ka pesos. Si Nap nga adunay tiket nga gihulog sa tambiyolo sa miaging tulo ka semana gipahinumdoman ni Ibong, iyang batabata. “Sir, karon ang bola sa usa ka milyon ka pesos sa kasino, ha? Unsang orasa ta mangadto?”

“Ay, abstain lang sa ko ron, Bong. Kun gusto ka, ikaw lang.” Hugot nga balibad sa retiradong maestro.

“Pero, Sir, simbako, matsambahan uroy’g imong ngan mahulbotan, unya wa ka didto, ma-forfiet?” May kahingawa ang tuno sa tingog sa Meron. “Ada, di gyod na mahitabo, Ibong! Lisod tong mabunutan ang akoa kay usa ra to ka rapol tiket ang giapil ko, unya tibuok Luzon, Visayas ug Mindanao nga mga tiket ang kuoton. Maayo unta’g ubay-ubay ang modaog. Pero, usa ra! Gisayonan ka ana?” Ang tinuod, walay gana si Nap nga mosulod og kasino niining adlawa tungod sa hilom duna siya’y gitago sa iyang batabata. Midaog siya ron og 4 digits sa Lotto. Apan wa niya pahibaw-a si Ibong aron di mangayo’g balato. Ikaduha, P50,000 ang iyang nakobra ug gianugonan siya nga basig masugal ni niya didto ug mahurot. Hinungdan, nga nakahukom siya nga dinhi nalang siya sa balay mag-inom-inom.

Wala na lang mamugos si Ibong. Solo kining miadto sa kasino nianang pagka alas 9:00 sa gabii aron motambong sa pagbola sa raffle tickets. Samtang si Nap kay daghan nang brandy nga nalad-ok, nahubog ug nakatulog. Udto nang nakamata si Nap. Iyang gisangpit si Ibong. Apan walay mitubag. Gisusi niya ang lawak-katulganan niini, apan katre ray iyang nakita. “Wala mouli si Ibong?” Naisa iyang kilay.

Unya, nakahunahuna siya nga kontakon niya kini. Pagpunit niya sa selpon, nakurat siya. Dunay 10 messages nga nakita niya didto sa screen. Gipindot niya ang open message button og gitagsatagsa niya sa pagbasa. Daw mahugno si Nap sa iyang gibarogan samtang nagpadayon sa pagtutok sa mga mensahe nga gikan  sa mga higala niyang sugarol, diin usa ra gyoy  unod: ‘Ikaw, Nap, ang midaog unta sa 1M raffle draw kagabii. Imoha gyong ngan ang napunitan. Pero, wa man ka, mibunot na lag lain. Ug suwerteha sa nakadaog, uy! Si...” Wala na niya tiwasag basa ang mensahe. Karon, nahibalo na si Nap nganong wala mouli si Ibong. Ug ambot, mobalik pa ba kaha kadto dinhi? Hinuon, dili siya makamahay ni Ibong. Giagda bitaw siya niini nga mangadto sila’g kasino kay adlaw sa 1M national raffle draw, si Nap may dili. Siya ang mitalikod sa debuynas nga gihagad ni Ibong kaniya. Tan-awa ron, oh, kinsay nakasalo sa debuynas? (Katapusan)