Police Lover

Bisan og gipawong ang suga sa lawak nga ilang nahimutangan ni Romeo ug Grace, apan mihatag gihapon og gamay’ng dan-ag ang suga nga wala mapawong gikan sa banyo.

Nagtubod ang laway ni Romeo nga nagsud-ong sa madanihon kaayong lawas sa gwapa nga polis nga wala na gayo’y bisan gamay’ng salimbong. Gihukas usab dayon ni Romeo ang tanan niya gisul-ob aron managsama sila si Grace nga walay salimbong sa ilang kalawasan.

Ingon sa mibukal na pag-ayo ang masi’g nila ka mga pagbati samtang walay hunong ang ilang pagparayganay. Nakabantay si Romeo nga mipaspas ang gininhawa ni Grace. Ingon usab niini ang gibati ni Romeo samtang padayon siya nga mipabatyag og kahinam sa gwapa nga polis.

Ilang gisaw-an sulod sa mamingaw’ng lawak  ang kalipay nga wala lang paabota ni Romeo nga mahitabo tali kanila ni Grace. “I love you Grace. Isaad ko nga mahalon ko ikaw sa tibuok kong kinabuhi,” gisaaran ni Romeo si Grace human sa ilang kumbati.

“Akong lauman nga unta dili na ako mohilak pa uban kanimo Rom. Ugma dayon, ipahikay nako ang annulment sa among kaminyoon ug sa akong bana,” matud ni Grace nga naghuhapohap sa dughan sa iyang boyfriend.

Milabay ang mga adlaw ug ngadto sa mga buwan. Lunlon kalipay ang natagamtaman ni Grace sa kiliran ni Romeo. Wala gayud moatubang ang bana ni Grace sa mga husay sa petition for annulment of marriage nga gisang-at ni Grace batok kaniya.

Gitawgan si Grace sa iyang abogado nga gi-grant na sa huwes ang ilang gipangayo. Gianular gayud ang kaminyoon ni Grace ug sa iyang bana. Paglabay sa pipila ka adlaw, gihikay dayon nila ni Romeo ug Grace ang ilang kaminyoon.

Gitabangan si Grace sa ilang opisyal nga mapadali ang paghikay sa mga gikinahanglang papeles. Bisan og sa huwes ra sila nagpakasal si Romeo ug Grace, apan wala kini makapugong sa nag-alintabo nila nga mga pagbati.

Usa ka hapon, gikuha ni Romeo si Grace didto sa police station. Naabtan ni Romeo nga dunay giabi-abi nga babaye si Grace. Nasayran niya nga biktima kini sa pagpangulata sa iyang bana ug hinungdan nga mireklamo kini sa PNP Women’s Desk.

“Paabuta lang ko kadiyot Rom kay tiwason nako kining reklamo ni Manang,” ni Grace pa human mi-kiss kang Romeo.

Samtang nagpaabot ni Grace didto sa usa ka lingkoranan, gilantaw niya ang gwapa niya nga asawa. Wala kapugngi ni Romeo nga mikalit lang pagpasunding sa iyang kaisipan kadtong higayon nga una niyang nakita si Grace dinhi sa maong police station.

Nakapahiyom si Romeo nga naghandom sa maong kagahapon kun ngano nga nagkaila sila ug sa paraygon niyang asawa. (Kataposan)