Paraygon nga Engkanto

Misakay sila si Jupet ug Laarni sa motor. Nagpahatud si Laarni sa Sitio Pungtod ug giubanan ang dalaga ni Jupet didto sa ngilit sa pangpang. Gusto sutaon ni Jupet kun hain gayud ang pinuy-anan ni Laarni.

“Dia na kita atubangan niining dakung kahoy Laarn. Bi asa man g’yud ang inyong balay?” matud ni Jupet. “Dili ka ba mahadlok nga mouban sa among pinuy-anan?” gisukna siya ni Laarni nga mitutok kaniya.

“Andam ko nga mouban nimo Laarn. Dili ko mahadlok kay in-love kaayo ko nimo,” ni Jupet pa. Gigunitan siya ni Laarni ug gitabonan ni Laarni sa iyang tuo nga palad ang mga mata ni Jupet.

“Bukha ang imong mga mata Jupet,” ni Laarni pa nga nagngisi. “Nahingangha pag-ayo si Jupet kay diha na siya sa balkon sa maanindot kaayong balay nga nag-umbaw sa dagat. Wala makatingog si Jupet tungod sa iyang nasaksihan.

Gitug-anan si Jupet ni Laarni nga karon nga tua na siya sa gingharian sa mga engkanto, dili na siya makita sa mga ordinaryong tawo ug dili na usab madungog ang iyang tingog bisan og mosinggit siya. “Pagka karon Jupet, dili ka pa makakita sa mga sama kanako apan dia ra sila sa palibot. Unya mo ra sila makita kun mohukom ka na nga moipon kanamo sa hingpit,” giingnan ni Laarni si Jupet.

“Tana, adto ta sa akong kwarto kay duna ko’y ipakita nimo,” gigunitan ni Laarni si Jupet. “Ayaw kabalaka, nananghid ko sa akong ginikanan ug sa akong mga kauban nga dad-on ko ikaw dinhi,” ni Laarni pa. Misulod sila sa kwarto. Kalit lang nga nausab ang gisul-ob ni Laarni. Sidlak-sidlak nga sapot na ang iyang gisul-ob. “Ayaw kahibulong Jupet. Karon, wala ka ba mahadlok nako?” ni Laarni pa.

“Wala g’yud ko mahadlok bisan gamay, gani kagaksonon na kayo ko nimo Laarni,” matud ni Jupet. Mingisi si Laarni. “Sigi gaksa ko…I love you too Jupet. Ang tinuod, dugay na ko nga nakaila nimo ug nahibawo ko nga buotan ka.”

Gigakus ni Jupet ang batan-ong engkantada. Gihagkan, mainampingon nga gidigo sa mga hawok. Nangalimyon ang kahumot ni Laarni nga nasimhot ni Jupet. Gitagbaw nila ang masi’g nila ka kaugalingon sa pagparayganay. Naangkon g’yud ni Jupet ang batan-ong engkantada. “Dili na ko mopauli, gusto ko nga anhi na mopuyo uban nimo Laarni,” ni Jupet pa.

“Salamat Jupet, mao kana ang gipaabot ko nga imong isulti,” ni Laarni. Subli nila nga giangkon ang kalipay. Walay kasayoran si Jupet nga gubot na sa gawas kay napalgan sa iyang mga kaubang drayber sa habal-habal ang iyang motor nga gibiyaan ra ngilit sa pangpang. (Kataposan)