Pagbuka ni Jupet sa iyang mga mata nakita niya si Laarni nga nagpahiyom. “Laarni! didto baya ko sa imong gikanaugan kaganina kay gimingaw ko nimo apan wala ka,” daw mora’g batang gamay si Jupet nga misugilon kang Laarni.
“Nganong gimingaw ka man nako?” gipangutana ni Laarni si Jupet. Mitutok pag-ayo si Jupet ni Laarni. “Ang tinuod, wala ko makasabot sa akong gibati. Nasabtan nako nga may pagbati ko kanimo Laarni,” ni Jupet pa nga migunit sa bukton sa dalaga.
“Wala ka pa makaila sa hingpit kanako Jupet,” matud ni Laarni. Nahukman ni Jupet nga pangutan-on niya ang dalaga kun tinuod ba ang ilang pagduda nga usa siya ka engkantada. Wala dayon motubag ang dalaga.
Nakigpanuroy si Laarni kang Jupet. “Ubani ko Jupet kay bisitahan nako ang akong Tiyo didto sa Sitio Tinubdan sa Barangay Lambusan,” ni Laarni pa nga miangkas pag-una sa motor. Gibiyaan ra nila ang motor didto sa karsada kay matud ni Laarni nga tua sa bukid ang balay sa iyang Tiyo.
Dili kaayo dugay ang ilang paglakaw. Nakabantay si Jupet nga ang dalan nga ilang gisubay adto mosangko sa gitawag og “Pangi,” usa ka langub nga dunay tinubdan sa tubig sa ilawom nga mao gani ang gikuhaan og tubig sa taga Lambusan.
“Huwata lang ko dinhi Jupet kay magdali ra ko, ako na lay mosulod kadiyot,” giingnan ni Laarni si Jupet dihang miabut na sila sa baba sa langub. Wala makatingog si Jupet sa iyang nadungog kang Laarni. Nanaug sa Laarni sa sementado nga hagdan paingon sa ilawom sa langub.
Gihimoan og sementado nga hagdan sa mga lumulopyo ang langub aron sayon ra kanila ang pagkuha’g tubig. Ang mga karaang lumulopyo sa Lambusan mitug-an nga dunay engkanto nga nagpuyo sa Pangi kay makahuwam gani sila kaniadto og bisti sa kasal.
Wala magpadaug sa iyang kahadlok si Jupet. Wala madugay mibalik si Laarni apan nakurat si Jupet kay lahi na ang gisul-ob niini nga sapot. Wala niya ipadayag ni Laarni ang iyang kahibulong. “Tana Jupet kay wala ang akong Tiyo, ang ako rang mga ig-agaw,” ni Laarni pa nga migunit sa bukton ni Jupet.
“Sa ato pa, tinuod gayud diay ang pagtoo sa akong mga higala nga usa ikaw ka engkantada Laarni,” giingnan ni Jupet ang dalaga. “Unya, mopadayon ka pa ba pagpanguyab og engkantada?” gisukna ni Laarni si Jupet.
“O, mopadayon ko sa pagpanguyab kanimo, dili ko mahadlok. I love you Laarni,” matud ni Jupet nga misagakay kang Laarni didto sa bakilid nga bahin sa agianan. (Sumpayan)