Goodbye is not Forever Gula 8
“Al, unsay nahitabo nimo?” mibuak sa kahilom si Josheba, “nga ingon sa wala ka man mahimutang?”
“H-ha? A-aw...wa-wala man...” ug iyang gikabig si Josheba ngadto kaniya.
Mipauraray usab ang dalaga sa iyang mga bukton.
Ngitngit ang sulod sa sinehan nga nahimutangan nila ni Albert ug Josheba. Dili usab daghan ang mga lingkoranan. Ug ang lingkoranan nila ni Albert ug Josheba nalayo sa ubang manan-away.
Gihinay pagsapwang ni Albert sa iyang palad ang suwang ni Josheba ug nahapaatubang kini kaniya. Nagkatinutokay sila. Bisan sa kangitngit sa sulod sa sinehan apan miamag ang ilang mga mata.
Sa misunod nga mga gutling, hinay apan mahinamon nga gipaduol ni Albert ang iyang mga ngabil ngadto sa mga ngabil sa hinigugma. Wala molihay si Josheba. Giukoban ni Albert ang mga ngabil niini. Mibalos usab pag-ukob ang dalaga. Mora sila’g gibayaw sa langit. Hangol kaayo ang hinagkan ni Albert kang Josheba. Mihangos siya. Gipiyong usab ni Josheba ang iyang mga mata samtang nagpamatyag sa makalipong ug makapalimot nga kalalim sa paghalok ni Albert kaniya.
Dugay ang ilang paghinagkanay. Diha na sila molugak sa usa’g-usa sa natapos na ang pelikula nga gisalida kay mibuhagay ang kahayag sa sugang dagitabnon sa sulod sa sinehan dungan sa paglanog sa kundatang hot music. -- Sumpayan pa
- Latest
