Magkatawa lang

Dear Tita Salie,

Maayong adlaw ug kumosta ka? Abi nimo, tita, ganahan kaayo ko mobasa sa imong mga tambag. Ug malingaw kaayo ko. Mao nga ganahan pud kaayo ko nga mangayo nimo og advice niining akong suliran.

Just call me Ms. Libra, dalaga apan nagproblema nako sa akong gugma. Kay sa tinuod lang wa ko makaseguro kun love ba gyud kining akong gibati karon. Ug naingon ko niini tungod kay dili pud ko sure kun love ba ko niining akong boyfriend.

Ang akong boyfriend, Tita, naa sa siyudad nag-work. Usahay magduda man ko niya nga mora og duna siya’y laing babaye nga gikabuangan. Kay ang iyang nawong ug pamayhon dili man pud kasaligan. Apan malipayon man ko uban kaniya, Tita.

Ang problema, Tita, kay kun mag-estorya na siya og seryoso magsige ra man ko og katawa, Tita. Igo lang nako siya kataw-an ug magbugal-bugal lang ko niya tungod kay mora man siya og dili katuohan. Anaa sa akong hunahuna nga iya lang ko nga gikalingawan, labi na kun maghisgot na siya parti og kasal namo. Matud pa nila ang mga pangako ay laging napapako.

Tinuod kaha kining iyaha diri nako, Tita? Palihug pasabta ko kun unsay akong buhaton. Daghang salamat. God bless you always.

* * *

Dear Ms. Libra,

Good day. Ikaw ang mas nasayod sa bayhon sa imong boyfriend. Busa ikaw usab ang mas nasayod kun duna bay kamatuoran ang iyang gisulti ug angay ba kining tuhoan. Sa iya pa lang nilihokan ug sinultihan imo na kining mahunahuna kun unsa siyang klase nga pagkatawo.  Tungod kay dunay daghang mga lalaki nga maayo kaayo mopasalig, ug mohisgot dayon og kasal ug kaminyoon aron gyud mosalig kaniya ang babaye. Mao kini ang kasagarang diskarte sa mga lalaking palikero.

Tan-awa usab ang dagan sa inyong relasyon kun anaa na ba kamo sa punto nga puwede  nga hisgotan ang kasal. Unsa na ba ka seryoso ang inyong panag-uban. Imo na siyang nailhan kun kinsa sa iyang pagkatawo kay kun pagarparon siya nga pagkatawo unya nagsige siya og hisgot og kasal o kaminyoon tingali kun part lamang kini sa iyang pagka-walay klaro.

Busa, ok lang imong pagkatawa kaniya aron usab maningkamot siyang magseryoso sa iyang pagkatawo. Panid-i una ang iyang batasan ug binuhatan kun angayan ba nga seryosohon ug hinuktokan ang iyang mga gipamulong. Mas maayo kun unya ka lang motuo kaniya kun mangatubang na gyud siya sa imong papa ug mama. -- Tita Salie