Ang gitas-on ug gidak-on sapagpili og opisyal

Daghan ang nag-ingon nga ang paghatag og katagbawan sa maayong serbisyo wala mag-agad sa gitas-on ug gidak-on sa mga hingtungdan nga mahimong pinili nga mga opisyal sa kagamhanan.

Matud pa nila nga ang atong pagpili og opisyal sa kagamhanan sa umaabot nga 2013 election wala’y kalainan sa bag-o lang nga napalabang nga balaod nga pagwagtang sa height requirements sa mahimong polis dinhi sa nasud.

Ang pagwagtang sa height requirements alang sa paghimong polis dinhi sa nasud tungod kay nakita man sa atong mga magbabalaod nga ang pamarog sa mga polis dinhi sa nasud dili maoy labing gikinahanglan.

Ang labing gikinahanglan mao ang ilang kakugi ug kamatinud-anon sa pagpangalagad sa paghupot sa katungdanan nga mao usab ang gipaabot sa katawhan.

Dugang pa nila nga daghan na kaayong mga nahimong pinili nga mga opisyal sama sa kongresista, gobernador, mayor ug uban pa nga dagko ug tag-as ang pamarog apan ang nakapait kay sa panahon sa ilang pagserbisyo dili na makit-an.

Gipasabot nila nga maayo kaayong modala og tago sa ilang kaugalingon  nga ang katawhan nga ilang gialagaran dihang naglingkod na sila sa katungdanan.

Ang pipila kanila makita man tuod bug-at kaayo ang buot sa pagtagad sa panginahanglan sa katawhan sa pagtuo nga sa panahon sa piniliay kuwarta na lamang ang palihukon.

Gitataw nila nga ang mga pinili nga opisyal nga nagkutsara na daan og bulawan nga nahimugso sa kalibutan dili gayod makasabot sa panginahanglan sa mga kabus nga katawhan tungod kay hamugaway na man daan ang pagkabutang ug wala kini makasinati og kalisod sa kahimtang.

Mao usab ang atong kapolisan nga ang gitas-on sa pamarog dili maoy sumbanan sa pagtuman sa kaakohan sa pagpatuman sa kahapsay ug kalinaw nga maoy nakaaghat sa mga magbabalaod sa hingpit na nga pagwagtang sa height requirements. (Romeo T.  Limpangog)