Miuban si Abner sa iyang amigo nga “nangugos” og bunyag sa anak sa iyang silingan kay sukad-masukad wala pa gayud siya makasaksi kun unsaon pagpahigayon ang pagbunyag og bata.
Tuod, didto na sila sa kumbento sa usa ka simbahan dinhi sa dakbayan sa Sugbo kay ang mga mangugos patambungon man usa og seminar aron katugotan nga sila makapangugos. Milingkud sila niadtong taas nga lingkuranan.
Wala pa magsugod ang seminar alang sa mga mangugos sa bunyag apan duna nay daghang nagpaabut nga nanglingkod na sa taas nga lingkoranan. Nabantayan ni Abner nga gwapa kaayo ang usa ka babaye nga nagkugos og bata diha sa lingkoranan sa iyang atubangan. Dunay tulo ka laing mga babaye nga kauban ang maong gwapa nga nagkugos sa bata. “Imo ning anak?” hinay ang tingog ni Abner nga nagpakisayud sa babaye. Miyango ang babaye ngadto kang Abner nga mitutok sa bata.
“Wala pa diay mangabot ang ubang mokugos sa bata?” dugang pangutana ni Abner sa babaye aron lang gayud nga sila magka-estorya. “Sila ra’ng tulo nga akong mga barkada ang mokugos ni Inday kay ako-ako ra man gud ni nga nagpabunyag,” pasabot sa babaye. Daw nahibulong si Abner sa gisulti sa babaye. “Pwede ko mokugos sa imong anak?” iyang giingnan ang gwapa nga babaye nga napalingi kang Abner. Gipasabot ni Abner ang babaye nga makahimo siya pagkugos kay mutambong man siya sa seminar.
“Para may lalaki ‘sab nga mokugos sa imong anak, dili pulos lang babaye. Hain diay ang Papa sa bata, wala pa maabot?” sukna ni Abner. Milingo-lingo ang babaye. “Mao bitaw na ang rason ngano nga ako-ako ra ni nga pagpabunyag kay wala na magtagad ang amahan sa bata,” sa babaye pa.
“Pwede ko makakugos sa imong anak kay dili man ko apil sa nangugos sa anak sa among silingan. Kuyog ra ko sa akong barkada,” ni Abner pa. “Sige, tana, ipalista tika nga apil sa mokugos sa akong anak kay tininuod man kaha na’ng imo,” matud sa babaye.
Nagpaila si Abner ngadto sa babaye. Ang babaye nagpaila usab sa angga nga Baby. “Lorena g’yud ang akong ngalan Ner pero naanad na ko nga Baby ang itawag nako sa akong mga amigo.”
Nahimuot kaayo ang mga kauban ni Abner nga kalit hinoon kini nga nakapangugos og bata nga walay tumong. “Mamili ‘sab ni’s Abner og bata nga kuguson da. Abi kay gwapa man ang inahan nagpanikad nga mokugos,” matud sa iyang higala nga si Mario. Human sa bunyag, giubanan ni Abner ang bag-o niya nga kumare adto sa usa ka Eat-All-You-Can restaurant. (Sumpayan)