Dear Tita Salie,
Have a wonderful day. Tagoa lang ko sa pangalan nga Ms. Leo. Separated ko sa akong partner nga dili mi kasal apan duna kami mga anak. Langyaw ang amahan sa akong mga anak, ug maayo na lang kay hangtod karon nagsuporta man gihapon siya sa mga bata. Wala lang gyod mi magkasinabot hinungdan nga nagbulag mi.
Medyo komplikado ang akong kinabuhi karon, Tita, mao nga komplikado usab kaayo ang akong problema.
Samtang separated ko sa akong partner, nakarelasyon ko og laing lalaki nga mas bata pa kay kanako ug duna usab siya’y anak apan dili sila kasado. Wala usab sila magtipon pagpuyo sa inahan sa iyang anak.
Love kaayo nako kining maong lalaki ug ako usab nga na-feel nga love pud kaayo ko niya. Apan akong nasayran, Tita Salie, nga nakauyab na pud siya og lain. Dihang akong gi-confront niangkon siya apan matud niya nga wala siya mahigugma sa maong babaye ug nga igo ra niya gisakyan tungod kay kwartahan.
Pero ako gihapon siyang gibulagan tungod kay dili ko ganahan nga daghan mi sa iyang kinabuhi. Apan gisakitan man ko, Tita, sa among panagbulag. Unsa may akong buhaton? Palihog pasabta ko. Thank you very much and more power. -- Ms. Leo
* * *
Dear Ms. Leo,
Sa akong tan-aw nianang imong boyfriend nga bag-o pa lang nimo nga gibulagan medyo chickboy kana o palikero. Ang ingon niana nga lalaki dili gyod seryoso sa relasyon. Ug makig-relasyon siya sa usa ka babaye tungod kay duna siya’y giapas sa maong babaye, ug dili gyud gugma ang hinungdan. Busa kinahanglan magbantay ka sa imong pagpakigrelasyon.
Husto ang imong gibuhat nga imo siyang gibulagan tungod kay ang iyang gibuhat nagmatuod lamang nga dili siya seryoso sa inyong relasyon. Dili tungod kay may mga anak kana sayon-sayonon ka lang niya. Butangi og pride ang imong kaugalingon aron imong maprotektahan ang imong kasingkasing aron dili kini masakitan.
Salig kanunay sa Dios ug pangayoa kaniya kanunay nga hatagan ka og relasyon diin malipayon ka og seryosohon ka sa lalaki nga imong higugmaon. Ilha pag-ayo ang lalaki nga imong higugmaon kanang lalaki nga andam modawat kanimo ug sa imong mga anak.
Apan ayaw kalimot nga posibleng undangan sa langyaw ang iyang pagsuporta kun ugaling iyang masayran nga aduna kanay gipuli kaniya. Paningkamot lamang nga makabarog ka uban ang imong mga anak aron dili kana magsalig kaniya. -- Tita Salie