Dear Tita Salie,
Maayong adlaw. Tagoa lang ko sa ngalan nga Acil, single pa ko apan duna nay 3 ka buok anak. Ang akong gikalibogan ug gikaproblemahan kay walay nahabilin sa 3 nako ka mga anak. Ako man unta ang inahan apan wala gyo’y bata nga nahabilin kanako.
Sa una nakong gikarelasyon nga lalaki duna mi’ 2 ka anak. Pero wala magdugay ang among relasyon tungod kay magsige ra mi og away. Ang una namong anak tua sa ginikanan sa akong uyab ug ang ikaduha namong anak tua karon sa akong mga ginikanan.
Human sa among panagbulag, nakaila ko og laing lalaki ug nahimo nakong live-in partner. Ug sa among relasyon ug pagtipon gihatagan mi og usa ka anak. Apan 1 year old pa gani ang bata gidala kini sa akong partner ngadto sa ilang probinsiya. Kay matud niya nga walay lingaw ang iyang inahan iya lang kuno nga ibilin didto ang bata.
Nagsige ko og hangyo nga iuli niya ang akong anak apan wala na gyod niya ipakita pagbalik kanako. Ug panagsa na lang pud siya muoli ngari kanako. Naglagot ug naglibog na gyod ko, Tita, sa angay nakong buhaton. Ug dili pa usab ako makahimo og lakaw karon kay wala pa koy kwarta kay wala pa man ko makabalik sa akong trabaho. Unsa may akong buhaton aron makuha nako pagbalik ang akong anak? Palihog pasabta ko. Thank you, Tita Salie, and more power. -- Acil
* * *
Hi, Acil. Ikaw ang inahan, busa dapat gyod unta anaa kanimo ang imong mga anak. Kay kun atong sundon ang atong balaod, ang bata nga 7 years old paubos anaa gyod sa kustodiya sa iyang inahan. Ikaw gyod ang mas dunay katungod nga moatiman kay imo silang mga anak. Ayaw kalimti nga ang mga bata mangita gyod kini sa ilang inahan. Makatugot ka ba nga sa matag gabii adunay 3 ka mga bata nga mora og piso nga nagpiyak-piyak kay nangita sa ilang tinuod nga inahan?
Kun gusto gyod nimong makuha ang imong anak nga gidala sa imong partner ngadto sa iyang inahan puyde gyod nimo kining makuha. Kay sa gikaingon ko na ikaw ang mas may katungod sa bata. Puyde pa gani nimo silang pasakaan og kaso kun magmagahi gyod sila sa pag-uli sa imong anak.
Apan sa dili ka pa magpalaban sa balaod, hangyoa pag-ayo ang imong partner nga dad-on ang bata diha sa inyo kay gimingaw ka na kaniya. Kun puyde mokuyog ka inigpauli niya didto sa ilaha aron makita nimo ang imong anak ug imong madala pagbalik diha sa inyong panimalay.
Pero kun magmagahi gyod sila pag-uli diha kana mosangpit og tabang sa atong balaod. Pangayo og tabang sa DSWD o pangayo og suporta sa grupo sa atong mga kababayen-an dinhi sa atong lugar. -- Tita Salie