Mangingilad sa parkingan

Sa pag-atras ni Rudy sa iyang Isuzu Sportivo nga itom balig usa ka metros pa lang, may nipikpik sa luyo sa sakyanan. Gipahunong niya kini. Bag-o lang siyang nagpalit og Avandamit tambal sa iyang dayabitis gikan sa Royal Charm Pharmacy sa Talamban.

Nia sulod sa parkingan sa botika ning sayong gabii niatras iyang sakyanan. Nitan-aw si Rudy sa side mirror ug nakita niya ang batan-ong lalaki nga nagsinyas nga naa siya’y naatrasan. Nagsagol iyang kulba ug kahibulong. Kay wa siyay nadungog nga nihagtok o nipaka. Nanaug siya. Iyang nakita ang motorsiklo usa ka metros sa luyo sa sakyanan niya nga nagligdas na sa semento nga parkingan. Nag-agas ang gasolina. Ug lumping na ang plate number niini. Nakapangawot siya sa iyang ulo.

"Kinsa may tag-iya ining motorsiklo, Dong?" nangutana siya sa nisinyas.

"Kadiyot lang kay akong tawgon," nisulod ang batan-on sa botika. Duha na silang nigawas. Ang batan-ong lalaki nga kaedad lang sa nisinyas nitikubo ug nisusi sa iyang motorsiklo. Gigunitan niya ang manibela.

"Ayg tandoga! Diha lang na!" mano sa nisenyas.

"Imo ning motorsiklo, Dong?" ni Rudy.

"O, sir" sa batan-on. Daghan nang nanapok nga mga estambay.

Nangayo si Rudy sa lisensiya ug rehistro sa tag-iya sa motorsiklo. Nabasa ni Rudy ang ngalan sa tag-iya nga si Fredo Dayag.

"Ikaw, testigos ka man. Kinsay ngan nimo?" ni Rudy ngadto sa nisensyas.

"Goding Arceo" sa batan-on. Gipakita sab niya iyang lisensiya.

"Pila may imong ipabayad sa damage sa motorsiklo?" ni Rudy ngadtong Fredo.

"Usa ka libo, sir" nibungat si Fredo. Nagpahiyom si Goding.

Nikuot si Rudy sa iyang pitaka. Kinyentos pesos tibook ug duha ka gatos tibook ang sulod.

"Kinyentos lang. Puwede?" ni Rudy.

"Kay duna man sab kay sala ining hitaboa. Tarong bana nga nga mo-parking ka luyo sa sakyanan nga ni-parking na daan? Unya di nimo bantayan imong sakyanan?" dugang niya.

Nikilo si Goding nga ipadawat na lang.

"Sigi, sir" ni Fredo. Gitunol ni Rudy ang kuwarta. Gidawat ni Fredo. Unya gitabangan siya ni Goding pag-irog sa motorsiklo natumba ngadto sa daplin.

Nibalik si Rudy sa iyang sakyanan. May gikuha. Pagbalik niya sa luyo sa sakyanan may dala siyang camcorder.

"Sa di pa ko mobiya, tan-awa sa ni ninyo, sa di pa ko moadto sa presinto sa pulis" ni Rudy ngadto ni Fredo ug Goding.

Gi-rewind ug gi-replay ni Rudy ang camcorder. Nakita ni Fredo ug Goding nga na-record sa camera ang ilang gibuhat. Nakita didto nga sa pag-parking pa lang sa Sportivo, ang motorsiklo ni Fredo nga tumba na daan ilang giirog ngadto sa luyo sa Sportivo.

Gigamitan ni Goding og playrs ang plate number aron mayupi. Nikaging ang duruha. Nakaamgo sila nga may camera diay ang luyo sa Sportivo. Paghuman og salida, nibalik si Rudy sa sakyanan.

"Adto na ko" niya pa.

"Sir, sir. Iuli lang nako ang kinyentos" ni Fredo. "Pasayloa lang mi sir. Komedya ra tong amo" ni Goding.

"Ipapriso gyud na sir. Daghan na sila’g biktima ana ilang modus!" May nisinggit sa mga nanan-aw. Gitan-aw ni Rudy ang duruha. Nagpakilooy ang hitsura. Nakapanglingo siya. Ug gitawag niya ang guwardiya sa botika. Nigawas ang guwardiya ug niduol nilang tulo.

"Guard timan-i ning mga hitsura ining mga tawhana. Mangingilad nis inyong parkingan. Patumbatumba  sa ilang motorsiklo nga konohay naatrasan. Pahimangno ang mga customer sa botika. Pahibaw-on ka lang nila kun may motorsiklo nga natumba sa ilang luyo," ni Rudy. Niyango-yango ang guwardiya.

"Nia akong tarheta" ni Rudy nga nitunol og calling card sa guwardia. "Ingna ang customer nga mabiktima ining tumbatumba sa motor sa luyo, ako'y molaban nila. Libre, basta mabalhog lang sa prisohan ning nag-modus og pangilad sa parkingan!" ni Rudy.

Gibasa sa guwardiya ang tarheta. "Rodolfo Gabucan, Lawyer/Notary Public, Upper Canduman, Mandaue CIty." Ug nilakang siya balik sa botika. (Kataposan)