Mga hinagtik sa lapida
Kilumkilum. Petsa 31 sa bulan sa Oktubre. May mga nanglimpiyo sa mga nitso sa sam-ang sa lungsod s Vergano. May mga nanaud og mga suga. Preparasyon sa Kalag-kalag ug Todos Los Santos. Ang tulo ka managsoong Ruben, Edgar ug Diogene maoy nangunay og instalar og sugang dagitabnon tungod sa mga nitso sa ilang ginikanan nga nagtupad. Sa napulo ka managsoon, silang tulo ang pinakatubigtubigan.
Si Ruben real estate broker nga big time. Kontak niya ang mga dagkong land developer sa siyudad: Si Edgar usa ka CPA, manedyer sa usa ka banko, managing partner sa usa ka dakong Accounting Firm ug nagtudlo sa inilang unibersidad sa dakbayan. Si Diogene usa ka seaman, kapitan ang lisensiya, overseas ang biyahe sa barko iyang gialagaran.
Nagkasabot silang tulo nga mobilar sa menteryo balig tulo ka gabii. Petsa 31 sa Oktubre ug uno’g dos sa Nobiyembre. Sila ang magtampotampo sa gastohan sa pagkaon ug ilimnon nilang tulo ug inig abot sa ilang mga igsoon ug mga pag-umangkon. Ulitawo pa man silang tulo. Pero daghan nag mga anak. Puro kinamaguwangan sa lainlaing babaye. Unya...
“Tik! tik! tik! tik! tik!” “Tik! tik! tik! tik! tik!”
May nadungog silang mga hinagtik sa nagsilsil og bato. Gilingi nila ang gigikanan sa mga hinagtik. Sa may diyes metros ang gilay-on dapit sa ilang wala, may tiguwang lalaki nga hubo, brief nga puti ray gisul-ob. Nagpongko tungod sa lapida nga marmol, pilit na sa nitso. Naggunit ang tiguwang sa walang kamot og puthaw nga mora’g tigib nga gamay. Sa toong kamot, gamay nga maso ang gigunitan sa tiguwang lalaki.
May gisilsil nga usa ka letra sa ngalan sa lapida nga nabasa na nga:
“NOMERIANO S. GATASAN
Born-January 23, 1934
Died-March 14, 2014
“Noy! Nag-unsa man ka diha?!” Ruben nga maoy isog-isog sa tulo.
Apan wala niduol sa tiguwang. Nilingi nila ang tiguwang.
“Akong gikorehean ang espeling sa akong ngalan. “O” man akong Numeriano. Dili man “U” sa tiguwang dayong kahanaw. Nanglimbawot ang mga balhibo sa tulo. Nagdungan og abli sa dalang ice box nga may sulod ilimnong makahubog. (Katapusan)
- Latest
