Magpakitabang ang Department of Education (DepEd) sa Central Visayas sa Department of Environment and Natural Resources (DENR) sa pag-ila sa mga kahoy sa mga eskuylahang publiko nga angay nang putlon aron di mameligro ang mga tinun-an ug mga magtutudlo. Masabot ang kabalaka ni DepEd 7 Regional Director Carmelita Dulangon tungod sa nangaging mga insidente sa pagkatumba sa pipila ka punoan sa kahoy.
Wa siya mag-inusara. Si Cebu Archbishop Jose Palma nidason sa awhag nilang Gobernador Junjun Davide ug sa pipila ka mayor sa habagatang Sugbo pagpamutol sa mga kahoy nga gipasanginlang nakahulga sa mga motorista ug mga pasahero sa nasudnong highway.
* * *
Pasayloa nga mopadayag ko og kabalaka sa implikasyon sa ilang sinultihan. Sa ilang mga mata, ang mga kahoy gyoy sad-an. Sa ilang pag-apura pagpahamtang sa silot nga kamatayon sa mga kahoy, wa gyod nila hatagi og bisan gamay na lang luna ang pagsusi unsay nakapahuyang sa mga punoan sa kahoy, may mahimo pa ba sa pagluwas nila ug unsay tukmang mga lakang nga himuon aron nga mahunong ang pagpanamastamas nga maoy tinuod nga nakapasakit ug nakapaluya sa mga kahoy.
Unsaon pa man nato pagdasig ang katawhan, labi nang kabataan, pagpananom og kahoy? Unsa may garantiya nga kon modagko nang mga kahoy di sab sila makahulga sa kinabuhi ug kabtangan sa sunod nga henerasyon?
* * *
Di kaha maayo nga inay magpatudlo ang kadagkoan sa DepEd asa ang mga kahoy nga putlununon magpatambag sila sa DENR unsaon pagpanalipod ug pagpalambo ang mga kahoy ug unsaon pagtambal ang masakiton nga mga punoan?
Di kaha maayo nga inay mag-apura pagpamutol sa nahibiling mga punoan sa kahoy magtinabangay ang kaparian ug lokal nga mga opisyal sa pagbadlong sa mga politiko ug mga negosyante nga maoy ganahan kaayong manglansang ug manapsap sa mga punoan sa kahoy aron bitayan sa ilang mga propaganda?
Di kaha maayo nga inay tungluhon nga hulga ang mga kahoy atong tudloan ang atong kaugalingon aron di na mahimong hulga nila?
* * *
Naukay ang mga molupyo sa Hong Kong dihang natumbahan og kahoy ang usa ka nagsabak nga babaye. Namatay ang babaye pag-abot sa tambalanan. Maong napugos ang mga doktor paghimo og dinalian nga caesarian operation pagluwas sa bata. Nabuhi ang bata apan tandugon ang kahimtang.
Nagkahiusa ang taga Hong Kong pagpangaliya nga mabuhi ang bata. Way bisan usa nila nga niawhag pagpamutol sa susamang mga kahoy aron nga di makahulga og dugang kinabuhi. Ang ang-ang sa polusyon sa Hong Kong usa sa labing taas sa Asya ug kalibotan. Mao ba ni hinungdan nga mas mahigugmaon sila sa mga kahoy? Magpaabot bang ang atong polusyon motupong una sa Hong Kong ug ubang kanasuran una magsugod og panalipod sa atong kakahoyan?