Bayad sa tour package sa Suroy-Suroy Sugbo gimenusan

CEBU, Philippines — Gipamenusan karon sa Probinsya sa Sugbo ang rate sa tour package sa mga buot moapil sa Suroy-Suroy Sugbo Northern Escapade.

Ang maong tourism caravan gikatakda sa Enero 23 ngadto sa 25, kon diin ang mga lungsod ug siyudad apil na mga isla sa norte ang suroyon.

Sumala sa Provincial Tourism Office ang package rate sa Suroy-Suroy magsugod P8,800 alang sa class C, P9,500 sa Class B, P10,500 sa class A ug P11, 500 sa premium. Ang maong rate magdepende sa kuhaon nga accomodation sa partisipante.

Si Marti Ybañez, ang provincial tourism officer, nagkanayon nga ang maong rate maoy nay pinakaubos sulod sa pipila ka tuig human miapelar si gobernador Gwendolyn Garcia sa mga tag-iya ug operator sa resorts nga baratuhon lang ang package o presyo sa mga accommodation niini aron daghan ang makaapil sa Suroy-Suroy.

Ang tulo ka adlaw ug duha ka gabii nga caravan mosuroy sa 14 ka lungsod ug usa ka siyudad sa Norte.

Ang unang adlaw adto sa Consolacion, Compostela, Carmen, Sogod, Medellin ug Daanbantayan. Sa ikaduhang adlaw adto sa San Remigio, Santa Fe, Madridejos ug Bantayan.

Samtang ang ika-tulo nga adlaw, ang dakbayan sa Bogo ug ang mga lungsod sa

Tabogon, Borbon, Catmon ug Liloan maoy ulahing suroyon sa mga partisipante nga pangulohan ni Garcia. MEL BANAT NEWS