Hinaut nitagam na
Para sa ordinaryong magbubuhis, bakakon siya. Pero sa iyang mga dumadapig maayo lang molipat-lipat sa iyang mga kaatbang. Para sa ordinaryong mga magbubuhis wala siyay panagana nga nisukwahi sa iyang kaugalingong istorya. Pero para sa iyang mga dumadapig kamao lang siyang manalipod sa iyang kaugalingon.
Maong ikaw na lay hukom sa nagkasungi nga mga sulti ni kanhi Presidente Rodrigo Duterte parte sa iyang kahimtang sa panalapi sa pag-atubang sa House Quad Committee sa niaging semana. Sa sinugdanan niinsistir nga wala siyay plite. Dayong human sa public hearing nikumpisal nga bilyonaryo diay.
* * *
Sa makadaghang higayon sa iyang pagtubag sa mga pangutana sa mga kongresista, gisal-ot sa kanhi presidente ang iyang awhag nga tiwason ang imbestigasyon sa lapad nga binayranay sa laktod nga pinatyanay sa iyang drug war kay mahal ang plite sa ayroplano ug bayad sa hotel ug iya rang retirement benefits ang gisaligan.
Pero sa sunod nga ginhawa nitanyag sa paghatag og usa ka milyon ka pesos para sa iyang napasagdan nga mga polis nga gikasohan, nasuspenso ug napriso kay igo lang nituman sa iyang sugo sa drug war.
* * *
Dihang gipakita ni kanhi Senador Antonio Trillanes ang giingong bank deposits niya ug sa mga sakop sa iyang pamilya nga balor og P2.4 bilyones, nisumbalik nga pamatud-an niyang bakak ang pasangil pinaagi sa pagpirma og waiver sa bank secrecy law ug pagbitay sa iyang kaugalingon kon mapamatud-an ang dakong katigayonan.
Pero wala pa gani mauga ang laway sa pagpanghimakak, nipasigarbo nga dunay singko bilyones pesos kay pulos negosyante ang iyang asawa ug kabit ug natigom ang dagko niyang suweldo.
* * *
Si Duterte gipasanginlang nigamit sa public hearings sa House ug Senado isip plataporma pagpasalig sa iyang mga dumadapig nga dili pa siya laos ug nga makabalik pa sa Malakanyang pinaagi sa iyang anak nga si Bise Presidente Sara Duterte.
Gawas nga bakakon, ang kanhi presidente nakamenos pa gyod sa pangutok sa iyang mga loyalista. Masaligon nga bisan mag-unsa pa siya og pakauwaw, moyango lang sila ug mo-abiba gihapon niya. Hinaot nga ang kinabag-an sa katawhan nakamata ug nitagam na. Ug dili na magpahudlat. Ni magpailad. Sa nukus-nukos niyang mga istorya.
* * *
- Latest
