Paalam Champ!
MANILA, Philippines — Kaliwa’t kanan ang pakikiramay sa pagkamatay ni dating Southeast Asian Games gold medalist Mervin Guarte na pinagsasaksak ng hindi pa nakikilalang salarin sa Calapan City, Oriental Mindoro.
Nasa 33-anyos lamang si Guarte.
Kaya naman bumuhos ang pakikiramay mula sa mga kasamahan nitong atleta gayundin sa ilang mga sports agencies at leaders.
Una na sa listahan si Tokyo at Paris Olympics veteran EJ Obiena na nag-iwan ng mensahe sa kanyang mga social media accounts.
“I just learned the devastating news of the shocking death of my friend and National Teammate Kuya Mervin Guarte. May his soul rest in peace, and I am sending my deepest condolences to his family and loved ones. What a tragedy. Only 33 years old,” ani Obiena.
Sinariwa ni Obiena ang mga panahon na nakasama nito si Guarte sa national team noong bahagi pa ito ng athletics team kung saan sinamahan nito ng picture ang kanyang post.
May mensahe rin ang kapwa SEA Games champion nito na si Kyle Antolin.
“Today, I mourn the loss of a dear friend. Mangyan, Mervin Guarte, you were one of the best friends and kindest people I have met in my life,” ani Antolin.
May kani-kanyang post din sina Olympian boxer Eumir Marcial, boxer Adan Gonzales, obstacle champion Mark Julius Rodelas at ang Philippine Sports Commission.
Naging bahagi si Guarte ng national athletics team kung saan nanalo ito ng dalawang pilak — sa 800m at 1500m — sa 2011 Jakarta SEA Games at isang pilak sa 2013 Myanmar SEA Games sa 800m.
Lumipat si Guarte sa obstacle course kung saan nakasungkit ito ng ginto noong 2019 Manila SEA Games at 2023 Cambodia SEA Games.
- Latest
