Alas ni Ahong
Unsa may gibasehan ni Lapu-Lapu City Mayor Ahong Chan sa iyang pasalig niadtong Hulyo nga walay ilegal nga Philippine Offshore Gaming Operation (POGO) sa iyang syudad?
Kon iya ra tong paukyab, mao ray nasulod sa iyang bakukang nga walay bisan unsa nga sukaranan, angay siyang mangayo og pasaylo sa iyang pataka ngadto sa mga Oponganon; pero
Kon gipasikad sa iyang gisugo nga mga inspeksiyon sa City Hall sa mga negosyo nga nahatagan nila og business permits, angay’g imbestigahon ang iyang mga sinaligan nga posibleng nakigkonsabo sa ilegal nga kalihokan.
* * *
Dili si Chan ray nanlipaghong sa kauwaw sa nasakpan nga ilegal nga POGO sa Sugbo. Ang Police Regional Office sa Central Visayas nipasalig sab niadtong Hulyo nga walay POGO sa Central Visayas.
Nipasalig si Chan nga human sa ronda sa POGO sa Mactan niadtong 2019 wala nay POGO sa Opon. Nipasalig sab ang kapolisan nga human nakandadohan ang lima ka POGO sa Sugbo sa nangaging katuigan wala nay bag-o. Pulos napamatud-ang bakak ang ilang pasalig sa ronda sa ilegal nga POGO sa Tourist Garden Hotel sa Agus, Lapu-Lapu niadtong Sabado.
* * *
Angay’ng imbestigahon ang kapolisan sa Lapu-Lapu sa kapakyas pagbadlong sa ilegal nga kalihokan sa ilang kaugalingong nataran. Nganong mas una pa mang nahibawo ang mga ahente sa Presidential Anti-Organized Crime Commission (PAOCC) ug National Bureau of Investigation (NBI) sa kaulohan?
Utrong imbestigahunon ang mga opisyal sa Barangay Agus. Kansang barangay hall nahimutang pila ra ka lakang gikan sa girondang POGO. Gawas lang kon gipalingiw sila gyod untay makabantay dayon sa dili kasarangang kalihokan sa ilang silingan.
* * *
Lisod tuohan ang pangangkon ni Chan nga wala siyay kalibotan sa operasyon sa POGO sa Tourist Garden Hotel. Kabahin sa iyang gahom paghatag og permiso sa mga negosyo ang katungdanan pagsusi tinuod bang mga negosyo nga gideklarar sa mga aplikasyon. Ang kataas sa mga koral sa hotel dili makabaraw sa iyang gahom sa pag-inspeksiyon.
Masaligon hinuon si Chan nga ang tanang pagduda mapahilom sa lig-on niyang koneksiyon. Nangangkon nga suod siya ni Presidential Assistant for the Visayas Terence Calatrava.
Kansang asawa igsuon ni Kongresista Yedda Romualdez, asawa ni House Speaker Martin Romualdez. Nga gituohang maoy tinuod nga hawod ning administrasyona.
* * *
- Latest
