Drayber nga nitulis ug nilugos sa iyang pasahero nadakpan

CEBU, Philippines — Nadakpan sa gilusad nga hot pursuit operation sa kapolisan ang multicab drayber nga suspetsdo sa pagtulis og paglugos diha sa lungsod sa Liloan.

 Ang kapolisan sa Liloan Police Station nga gipangulohan sa ilang hepe  nidakop sa maong drayber atol sa gipahigayon nila nga hot pursuit operation alas-10  sa gabii niadtong Biyernes diha sa  Sitio Cumbar Yati Liloan.

Matud pa sa kapolisan, gireklamo ang suspek sa 33-anyos nga ginang nga taga  Dakbayan sa Mandaue.            

Basi sa report sa kapolisan, nahitabo ang krimen alas 12: 20 ang takna  sa kadlawon Pebrero 6, 2025.

Sa imbestigasyon sa kapolisan pasahero sa suspek ang biktima kinsa diha milingkod tupad niini sa frontseat.

Apan pag-abot nila sa eskina sa Yati, Liloan gikatahong kalit nga niliko sa tuo padung sa us aka hilit nga dalan ang suspek ug didto gitionan niini og kutsilyo ang ginang ug pugsanong gidala sa usa ka abandonadong balay ug didto kini gilugos.

Matud pa ni Arcilla nga human nila madawat ang maong taho dali  nilang gisusi ang footage  sa mga CCTV ug nipahigayon og hot pursuit operation dihang nailhan na nila ang  suspek.

Samtang nagpadayon sila sa ilang hot pursuit operation dunay nitawag kanila nga nipahibalo sa nahimutangan sa suspek hinungdan nga ilaha kining giadto ug didto ilang gidakop. (BANAT NEWS)