National Convention of lawyers himoon sa Enero sunod tuig

CEBU, Philippines — Ang Cebu gitakda nga maoy mo-host sa 20th National Convention of Lawyers, nga himoon karong Enero 30 ngadto sa Pebrero sa sunod tuig.

Si Integrated Bar of the Philippines (IBP) National President Atty. Antonio Pido ug Executive Vice President Atty. Allan Panolong ang midapit kang Governor Gwendolyn Garcia nga motambong sa kalihukan.

Segun sa tahu sa Sugbo News, ang media arm sa Cebu Provincial Capitol, gibana-bana nga mokabat sa 4,000 ka mga abogado gikan sa gobyerno ug pribadong sector ang gipaabot nga mosalmot sa convention. Ang nahisgutang convention maoy magsilbi nga usa sa lima ka rekisitos sa attendance sa national o regional events nga gikinahanglan aron makabaton og lifetime membership sa IBP.

Ang mga miyembro sa IBP gi-required nga mokompleto sa MCLE aron mahimong updated sa mga legal developments ug jurisprudence, pagbaton og ethical standards, ug mopalambo sa kalidad sa ilang legal practice.

Si Supreme Court, Chief Justice Alexander G. Gesmundo, gipaabot nga motambong sa opening day sa convention kauban ang ubang mga Justices nga magsilbi nga MCLE lecturers atol sa event.

Si gobernador Garcia nipasalig og suporta alang sa kalamposan sa maong programa. (BANAT NEWS)