Misis ug kabit nga senior gipadakop

CEBU, Philippines — Gipadakop sa usa ka bana ang iyahang asawa apil na ang giingong kabit niini nga ilaha rang silingan human nasakpan nga nagtagay sa lawasnong kalipay sa kwarto sa usa ka motel diha sa General Maxilom Extension, Barangay Carreta, siyudad sa Sugbo niadtong Miyerkules sa udto, Nobiyembre 6, 2024.

Ang asawa nag edad og 44 anyos samtang ang giingong kabit niini nga silingan ra nila sa usa sa mga barangay sa Dakbayan sa Talisay usa na ka senior citizen nga nagpangidaron og 62 anyos.

Nitawag sa Waterfront Police Station 3 sa Cebu City Police Office ug nagpahibawo nga nakit-an niya iyahang asawa ug ang giingong kabit niini nga mi-check in sa maong motel.

Sa pag-abot sa mga polis, diretso silang nisulod sa Room 9 sa maong motel kauban ang bana ug didto nasakpan gyud ang duha nga nagtagay sa lawasnong kalipay hinungdan nga sila gidakop.

Kasong adultery ang ipasaka batok sa asawa ug sa giingong kabit niini.  IBM BANAT NEWS