Cortes gikasohan og disqualification, reklamo batok kang Gacia gibasura

CEBU, Philippines — Gipasakaan og kasong disqualification si dismissed Mandaue City Mayor Jonas Cortes ngadto sa Comelec tungod kay giingong namakak kini sa iyahang gisang-at nga certificate of candidacy.

Duha ka residente sa Barangay Labogon, Dakbayan sa Mandaue ang nisang-at sa disqualification case batok kang Cortes tungod kay giingong nakahimo kini og material misrepresentation dihang gibutang sa naulahi sa iyahang COC nga eligible pa siya nga magpapili bisan pa og adunay mando sa Office of the Ombudsman nga nag-dismiss kaniya sa serbisyo.

Ang mga nisang-at og petisyon sa pagpakanselar kang Cortes sa COC niini mao sila si Ines Corbo Necessario ug Julita Oporto Narte.  Sa ilang petisyon tinguha nila nga mapapas ang ngalan sa dismissed mayor sa certified list of candidates ug dili siya apilon sa official ballots nga gamiton sa May 2025 election.

Gikutlo sa mga petitioners ang Administrative Order No. 17 Series of 2023 nga niamendar sa Rule III sa Rules of Procedure sa Office of the Ombudsman nga naglatid nga “An appeal shall not stop a decision from being executory… A decision of the Office of the Ombudsman in administrative cases shall be executed as a matter of course....Thus, notwithstanding an appeal, the decision… is immediately executory. Further, it has long been settled that a dismissal order from the Office of the Ombudsman is executory".  Niadtong Septiyembre 26, 2024 ang Office of the Ombudsman nipagawas og kamandoan nga nag-dismiss kang Cortes kay giingong guilty kini sa grave misconduct. 

Sa laing bahin, gibasura sa Office of the President ang kasong gipasang-at ni dismissed mayor Michael Rama batok kang Gobernador Gwendolyn Garcia kalabot sa pagpahunong sa gobernadora sa padayon nga trabaho sa Cebu Bus Rapid Transit (CBRT) diha sa may Osmeña Boulevard, Dakbayan sa Sugbo.

Sa 11 ka pahina nga desisyon sa buhatan sa presidente nagkanayon nga dili igo ang ebidensya o kulang sa “prima facie case” ang gisang-at ni Rama batok sa gobernadora.

Niadtong Marso 20 karong tuiga, si Rama nipasaka og reklamo batok kang Garcia tungod sa pagluwat niini og memorandum pagpahunong sa Hunan Road and Bridge Construction Group Co. sa pagtrabaho sa CBRT diha sa property sa Kapitolyo sa may Osmeña Boulevard.

Ang tubag ni Garcia ngadto sa OP nagkanayon nga ang pagluwat niya sa maong memorandum gihimo isip tag-iya sa property diin gitukod ang terminal sa CBRT. Ang maong property usa ka national landmark diin buot panalipdan sa gobernadora ang cultural ug historical integrity sa Capitol buildingng.

Human sa pagsusi sa maong rekalmo ug pagtimbang sa argumento nga gisumiter sa duha ka kampo, ang OP nipabor sa kampo ni Garcia. Matud sa OP nga pakyas si Rama pagpamatuod nga si Garcia nakahimo og  grave misconduct or conduct prejudicial to the best interest of service, oppression o abuse of authority.

Sa iyang bahin, si Rama wala mohatag og pamahayag diin matud niya nga wala pa siya nakadawat sa kopya sa desisyon. —Le Phyllis F. Antojado ug Iris Hazel M. Mascardo/BDB BANAT NEWS