20 ka out-of-school youth nigradwar sa Life Skills Training

CEBU, Philippines — Ni-gradwar na niadtong Agusto 27, 2024 ang 20 ka mga out-of-school youth atol sa gipahigayong Life Skills Training nga gipasiugdahan sa Kagamhanan sa Dakbayan sa Sugbo, Department of Manpower Development and Placement, ug Jobstart Philippines Program sa Department of Labor and Employment -7.

Ang mga ni-gradwar nga kabatan-unan nagpangidaron og 18 ngadto sa 24 anyos ug nipaubos kini og 10 ka adlaw nga pagbansay-bansay aron nga maandam sila alang sa ilang umaabot nga pagpanarbaho.

Subay sa ilang training, gitudluan sila sa husto nga values, time management, paghatag og bili sa himsog nga panglawas, occupational safety, pag-andam sa ilang resume, hangtud na sa pagtubag sa interview.

Mapasigarbuhon ang Department Head ug PESO Manager sa DMDP nga si Engr. Suzanne Ardosa tungod sa kalampusan nga naangkon sa mga job starters diin nagpamatuod kini nga aduna silay nakat-unan sa ilang pagbansay-bansay ug andam na sila nga mo-atubang sa mga trabaho sa komunidad.

“Mitan-aw bitaw ko sa results sa inyong interview, most of you, na hired-on-the-spot man mo tanan. Kung tinuod pa mo nga nang-apply ug trabaho, kamong tanan 20 ka buok dawat gyud mo. Dili lang ka-usa, ka-duha, ang uban katulo pa. So that means, duna namo’y confidence in yourself ug duna mo’y nakat-unan sa training,” mensahe pa ni Ardosa ngadto sa mga ni-gradwar.

Karong Septiyembre, ipaubos na sab ang 20 ka mga ni-gradwar sa technical ug on-the-job training sa mga nagpaabot nga mga employers agi ug pag-andam kanila sa tinuod nga trabaho. — MEL BANAT NEWS