Tommy O.: Tiguwang nako

CEBU, Philippines — “Mao na ni akong katapusan nga eleksyon, kay sa tinuod dili nako makadagan pagkamayor, di nako kaya, tiguwang nako,” mao kini ang gibutyag ni kanhi mayor Tomas atol sa pagsikad sa lokal nga kampanya nga gipahigayon sa gawas sa Archdiocesan Shrine of Our Lady of Guadalupe de Cebu sa Barangay Guadalupe kagahapon, Marso 28, 2025.

Si Osmeña magpipili pagka bise mayor kapares si Konsehal Nestor Archival kinsa magpapili pagkamayor sa dakbayan.

Ang 76-anyos nga si Osmeña maoy founder sa Bando Osmeña – Pundok Kauswagan nga maoy ilang gipasilungan nilang duha ni Archival.

Nahimong mayor si Osmeña sa makatulo nga higayon. Una niadtong 1987 hangtud na sa 1995 ug subli nga nahimong milingkod niadtong tuig 2001 ngadto na sa 2010, ug ang iyang ulahing termino niadtong 2016 hangtud na sa 2019.

Gawas sa iyang pangamahan sa syudad sa pipila ka mga katuigan, nahimo sab siya nga congressman sa ikaduhang distrito niadtong 2010 hangtud na sa 2013.

Sa pagpakighinabi kang Osmeña, maisugon niya nga gibutyag nga wala gyud siya makauyon sa nahitabong kurapsyon sa City Hall.

Ang pag-endorso niya kang Archival nga maoy mahimong mayor mao ang nahimong alternatibo aron nga mapakgang ang mga kahiwian diha sa kagamhanan. Gitug-an niya nga mopahuway na gyud unta siya sa politika apan nakita niya nga kinahanglan sab ni Archival og katambayayong aron nga masolusyonan ang mga problema sa siyudad.

Dugang pa ni Osmeña tumong niya sa iyang pagdagan karong Mayo 12 mao ang pagbanhaw sa iyang mga nasugdan nga mga programa kaniadto nga inanay na nga nangawala tungod kay napasagdan na kasamtangang administrasyon.  IBM BANAT NEWS