VIS nahuman na’g printa sa Comelec
CEBU, Philippines — Nahuman na sa printa ang Commission on Elections (COMELEC) sa kinatibuk-ang 68 milyones ka voters information sheet (VIS) alang sa 2025 nga piniliay, karong Biyernes, Marso 28.
Base sa pinakaulahing datus sa Comelec ang National Printing Office (NPO) nakaprinta og 68,431,965 milyones ka VIS kagahapon, nga mao usab ang gidaghanon sa mga local registered voters lukop nasud.
Ang VIS, partikular nga gihimo sa Comelec, maoy giya sa mga botante sa pagbotar.
Ang matag VIS dunay upat ka pahina nga naglakip sa ngalan sa botante, adres, numero sa presinto, ug detalyadong instruksyon sa proseso sa pagbotar.
Naglangkob usab kini sa kompletong listahan sa nasyonal ug lokal nga mga kandidato, uban sa 155 ka accredited party-lists alang sa 2025 National and Local Elections (NLE).
Si Comelec Chairman George Erwin Garcia niawhag sa mga botante sa paggamit sa VIS kaysa magsalig sa sample ballots nga gipang-apod-apod sa mga politikanhong grupo.
Kining mga sample ballot sa mga political groups wala gidili sa Comelec, apan dili kini pwede ipang-apud sa adlaw sa piniliay tungod sa campaign ban.
Samtang ang VIS, dili mahimong kompiskahon o kwestiyonon kay para gyud kini sa mga botante nga gikan mismo sa Comelec ug dili sa barangay mao nga i-house to house ang paghatag niini sugod sunod buwan, Abril.
Pipila ka rehiyon sa Mindanao ang nagsugod na sa pagdawat niini sayo ning semanaha.
Apan mipasidaan siya nga nga dunay politiko sa Mindanao nga nagpakatap og disinformation nga nag-awhag sa mga tawo nga dili mopirma og mga dokumento sa pagdawat niini kay gipasangil niya kining gamiton sa People’s Initiative o usa ka petisyon aron pag impeach ni Bise Presidente Sara Duterte.
Matud ni Garcia dili kini tinuod.
Ang dili makadawat sa ilang VIS mahimo gihapong maka-access niini sa online precinct finder sa Comelec nga ma access sa online duha ka semana sa dili pa ang piniliay karong Mayo 12. IBM BANAT NEWS
- Latest
