Lalaki nawad-ag kontrol sa motor nakalas
CEBU, Philippines — Patay ang usa ka 20-anyos nga lalake human madisgrasya ang gimanehong motorsiklo duol sa Torre sa South Road Properties(SRP) pasado ala 1 sa kadlawon kagahapon, Sabado, Marso 22, 2025.
Ang biktima mao si alyas Kurt, 20, nagpuyo sa Barangay Dumlog, Dakbayan sa Talisay.
Base sa imbestigasyon sa Traffic Enforcement Unit sa Cebu City Police Office ang biktima gabiyahe sa southbound direction.
Pag-abot sa naasoy nga dapit giingong nawagtangan kini og kontrol ug balanse sa motorsiklo hinungdan nga nibaliwliw ug nalamba.
Gituohan sa kapolisan nga nag over speeding kini maong nawad-an kini og kontrol sa motor.
Ang Cebu South Coastal Road diha sa SRP nagtugot lamang sa mga motorista og 40km/hr nga speed limit aron paglikay sa disgrasya apan nabantayan nga daghan gihapong mga sakyanan ug motor nga magpakusog og dagan lapas sa speed limit diha sa maong dapit ilabi na panahon sa lawom nga kagabhion hangtud sa kaadlawon kay mingaw ang lugar.
Nalabay matud pa ang biktima sa pikas dalan nga nakaingon sa grabeng mga kadaut sa kalawasan nga naangkon ug hinungdan sa iyang kamatayon.
Una na nga nagpahinumdom ang Cebu City Police Office sa motorista nga sa dili pa mobiyahe siguraduhon nga maayo ang kondisyon sa lawas ug wala nakainom aron dili madisgrasya ug maka disgrasya sa uban. (BANAT NEWS)
- Latest
