Maiden name magamit na pag-renew sa passport

MANILA, Philippines — Nunot sa pagpatuman sa New Philippine Passport Act o Republic Act. 11983, ang Department of Foreign Affairs - Office of Consular Affairs (DFA-OCA) nagpahibalo sa publiko nga ang mga minyo nga babaye nga mo-renew sa ilang pasaporte mahimo na nga boluntaryong mogamit pagbalik sa ilang apelyido sa pagkadalaga.

Niadtong Biyernes, Marso 21, ang DFA-OCA mipahibalo nga ang mga renewal karon nagtanyag niini nga opsyon, basta ang mga rekisitos matuman.

Kini nagpasabot nga ang mga babayeng Pilipino adunay legal nga katungod sa paggamit sa ilang apelyido sa pagkadalaga sa ilang mga pasaporte.

Apan, one-time change ra kini kun kausa ra kini himoon ug kun nahimo na kini kinahanglang makita sa tanan nilang opisyal nga mga identification documents.

Ang mga aplikante kinahanglang mosumitir og orihinal ug photocopy sa ilang PSA-issued birth ug marriage certificates, usa ka notarized Affidavit of Explanation nga naghangyo sa pagbag-o sa pangalan ug pagkumpirma nga wala pa sila maka-avail niini, ilang pinakaulahing Philippine passport o travel document, ug usa ka balido nga government-issued ID nga nagpakita sa ilang maiden name.

Sa mga kaso diin ang usa ka minyo nga babaye gusto nga i reclaim ang iyang maiden name sa iyang pasaporte, isip resulta sa annulment, declaration of nullity, legal separation, foreign divorce, o widowhood, kinahanglan ang mga tukma nga dokumento alang sa pagproseso.

Gawas sa paghatag sa ilang latest nga Philippine passport (kon anaa) ug PSA-issued Certificate of Live Birth, ang gikinahanglan nga mga dokumento nga may kalabutan sa kaminyoon managlahi base sa rason sa pag-ilis sa apelyido.

Alang niadtong namatay na ang kapikas, gikinahanglan ang orihinal ug kopya sa PSA-issued Death Certificate (o langyaw nga katumbas sa English translation).

Apan kung ang kaminyuon natapos pinaagi sa annulment, declaration of nullity, legal separation, o usa ka judicially recognized divorce (langyaw o ubos sa PD No. 1083), gikinahanglan ang orihinal ug photocopy sa PSA-issued Marriage Certificate nga adunay annotation nga nagpakita sa dissolution sa kaminyuon.

Ang OCA miingon nga ang mga aplikante kinahanglang mogamit sa gitakda nga affidavit template, nga anaa sa ilang website.

Matud pa niini nga dawaton usab ang usa ka duly notarized affidavit, basta klaro nga gipahayag niini ang rason sa aplikante sa pagbalik sa iyang maiden name ug pagkumpirma sa pagsunod sa tanang documentary requirements.(BANAT NEWS)