Abril 1, regular holiday

CEBU, Philippines — Gideklarar ni Presidente Ferdinand "Bongbong" Marcos Jr., nga Regular Holiday sa Martes, Abril 1, 2025 sa tibuok nasud agi’g pag-obserbar sa Eid'l Fitr o Feast of Ramadhan.

Kini gianunsiyo pinaagi sa Proclamation No. 839, nga gipirmahan niadtong Marso 20, 2025, sa rekomendasyon sa National Commission on Muslim Filipinos (NCMF).

Gisugyot sa NCMF ang Marso 31 (Lunes) o Abril 1 (Martes), 2025, isip usa ka national holiday sa paghandum sa pagtapos sa balaang bulan sa Ramadan, ug gipili ni Presidente Ferdinand R. Marcos Jr. ang Abril 1 isip opisyal nga regular holiday alang sa maong selebrasyon.

Ang Eid'l Fitr, usa sa labing mahinungdanong mga selebrasyon sa Islam, nagtimaan sa pagtapos sa Ramadan, usa ka bulan sa pagpuasa, pag-ampo, ug pagpamalandong nga giobserbahan sa mga Muslim sa tibuok kalibutan.

"In order to bring the religious and cultural significance of the Eid'l Fitr to the fore of national consciousness, and to allow the entire Filipino nation to join their Muslim brothers and sisters in peace and harmony in the observance and celebration of Eid'l Fitr, it is necessary to declare 01 April 2025, Tuesday, a regular holiday throughout the country," ang proklamasyon nag-ingon.

Kini nga deklarasyon subay sa Republic Act No. 9177, nga nagtakda sa Eid’l Fitr isip regular holiday sa Pilipinas. bTungod kay kini usa ka regular nga holiday, ang mga trabahante sa pribadong sektor kinahanglang mosunod sa lagda sa suholan ubos mando sa Department of Labor and Employment (DOLE).

Sa mga empleyado nga dili motrabaho sa Abril 1, 2025, makadawat gihapon og 100 porsyento sa ilang inadlaw nga sweldo. Ang mga motrabaho atol sa holiday makadawat og 200 porsyento sa ilang inadlaw nga sweldo o double pay.

SamtQng, kung ang usa ka empleyado nag-overtime o nitrabaho lapas sa walo ka oras anang adlawa, adunay dugang nga 30 porsyento sa ilang hourly rate gawas sa ilang 200 porysento nga suweldo.

Ang mga empleyado nga nagtrabaho sa holiday atol sa ilang rest day makadawat og extra 30 porsyento sa ilang double pay. -  IBM BANAT NEWS