Mandaue ug Minglanilla

CEBU, Philippines — Duha ka sunog ang niulbo sa Dakbayan sa Mandaue ug Lungsod sa Minglanilla, adlaw nga Biyernes Marso 21, 2025.

Ang unang sunog nahitabo sa Purok 3, Barangay Tingub, Dakbayan sa Mandaue alas-10:31 sa buntag nga naglambigit og two-storey residential building nga giingong gipuy-an ni Charlie Enoc. Napawong kini alas 11:01 sa buntag.

Walay gikataho nga nakalas o naangol sa maong insidente apan nidanyos og P95,00 sa duha ka panimalay nga naugdaw.

Samtang sa Lungsod sa Minglanilla usa ka dakong sunog ang niulbo sa may Purok 9, ward 4 alas-12:59 nga nilanat sa 20 minutos una napalong ang kayo.

Ang lokal nga kagamhanan sa Minglanilla, pinaagi sa Municipal Social Welfare and Development (MSWD), nanghatag na og hinabang para sa mga nasunogan.

Matud pa ni Mayor Rajiv Enad 60 ka tawo ang naapektahan niini.

Si Enad, nihangyo sa tanan nga magbantay ug mosunod sa fire safety measures aron malikayan ang susamang trahedya sa umaabot.

Gisusi pa sa kabomberohan ang hinungdan sa maong mga sunog.  IBM  BANAT NEWS